Herold

Datalagring og kunstig intelligens (KI, også kalla AI) er dei to store aktivitetane i moderne datasenter, der KI er den fullstendig dominerande når det gjeld bruk av straum. Det er enorme mengder som trengst, og mykje meir i framtida enn nett i dag.

Lokalt er det for tida stort fokus på arbeidsplassar i eit datasenter, men ein må ha i tankane at viktigaste oppgåva til KI er faktisk å avskaffa arbeidsplassar! Det er ikkje ein utilsikta biverknad, det er hovudføremålet med KI. Og me snakkar ikkje berre om framtida, dette er allereie i full gang.

I dag tidleg las eg faktisk i Dagens Næringsliv om ein som har tatt konsekvensen: «Jeg har brukt 10.000 timer på å bli ekspert. Nå investerer jeg sparepengene mine i selskapene som gjør meg overflødig.»

Han innser at alt er bortkasta, og at det suksessfulle firmaet han har bygt opp i det siste, vil gå dukken, fordi KI vil overflødiggjera kompetansen hans. Så nå investerer han heller pengane sine i KI.

I mi tid i databransjen var oppgåva vår å laga løysingar som kombinerte manuelle og datatekniske rutinar på ein måte som gjorde jobben meir interessant for arbeidstakaren. Programma skulle redusera dei kjedelege oppgåvene, fjerna feilkjelder, kvalitetssikra data, og slik syta for at arbeidstakaren fekk konsentrera seg om dei viktige oppgåvene, dei som trong litt kreativ hjernekapasitet. Somme trudde at eg steig inn i bedriftene for å gjera dei tilsette overflødige, men det skjedde aldri. Dei fekk berre meir tid til viktige oppgåver som kanskje hadde blitt forsømde tidlegare.

Med KI er det stikk motsett, for den har til oppgåve å ta seg av dei krevjande oppgåvene, dei som krev kreative og intelligente ekspertar. Berre dei kjedelege rutinejobbane vil bli utførte av arbeidstakarane. Det er dette som er det skumle, kompetanse blir overflødig, for ingen vil kunna konkurrera med KI.

Alt i dag finst for eksempel KI-legen, KI-advokaten, KI-komponisten, og fleire. Dei gjer for det meste ein like god jobb som den menneskelege utgåva, men mykje raskare, og til langt lågare pris. Om få år vil KI-agentane vera suverene, også på kvalitet, med det resultatet at arbeidsplassane forsvinn i stort tempo.

Dei som i dag har fysiske jobbar, vil nok stort sett få behalda desse. Det er ikkje så lett å la KI erstatta bønder, fiskarar, bilmekanikarar, snikrar og handverkarar. Men alle som i dag har arbeidsplassen sin ved ein kontorpult, bør kjenna seg utrygge. Kanskje så mykje som halvparten av desse vil forsvinna, på relativt kort tid.

Analytikarar har komme fram til at ein milliard arbeidsplassar kan bli borte. Det er eit ekstremt høgt tal, som indikerer at det på verdsbasis kan bli krise. Om me opplever det slik i Kvinnherad, kan me få ei arbeidsløyse på over 25 prosent!

Det blir visst lova 100 faste arbeidsplassar på det nye datasenteret, i stil med det som er vanleg å lova for eit slikt senter. For meg verkar det meir realistisk å tenkja 15 faste, for etter kvart KI vil naturlegvis overta dei fleste funksjonar i eit slikt anlegg også.

Så kan ein til slutt filosofera litt over om eit datasenter på Husnes vil skaffa arbeidsplassar. Eller om det vil avskaffa arbeidsplassar. Eg veit ikkje svaret.