Rune bomma kraftig – nå sikter han på 100 millioner
Plus
Rune Digranes Bøen hadde lita tru på etableringa for 30 år sidan. I dag er han sjef i den aktuelle bedrifta og siktar mot ei omsetning på 100 millionar kroner.
Smiler
Ein til
Bomma
Turistar og studentar
Feira
Rema 1000 i Lundevegen i Bø, som blei etablert i 1995, har markert jubileet denne veka.
Rune Digranes Bøen, som driv denne forretninga i dag på såkalla franchise, smiler når han tenkjer tilbake på det som skjedde for 30 år sidan.
– Eg arbeidde da i Selsberg Kaffe på Langhus. Der lurte me veldig på at Rema skulle opne butikk i vesle Bø. Me som arbeidde på Langhus hadde null tru på at det ville gå bra, fortel Rune. I dag har han ein av fem daglegvareforretningar i Bø sentrum.
Det høyrer med at Rema 1000 også for nokre år sidan etablerte seg med ei ny forretning i Skogen-kvartalet i Bø sentrum.
– Det skjedde nok fordi Rema frykta at andre kjeder ville etablere seg i lokala i Lundevegen viss den butikken blei lagt ned. Lokaliseringa vår til bygdas største bustadfelt, Breisås som har nærmare 1.000 husstandar, er ideell, seier Rune.
I dag kan han konstatere at både han og kollegaene bomma kraftig for 30 år sidan.
– Omsetninga for butikken vår ser ut til å bli på 84–85 millionar kroner i 2025. Det inneber ein vekst på fire prosent frå i fjor. Folk ler av målet mitt om at me skal passere 100 millionar kroner om tre år, men eg føler at det er mogleg, seier den engasjerte drivaren.
– Korleis kan det vere plass til fem daglegvareforretningar i Bø?
– Det skuldast nok både den store turisttrafikken om sommaren og dei mange studentane i bygda. Vår butikk har temmeleg jamn omsetning gjennom år og er nok den som merkar minst til turistane, svarar Rune. Butikken hans har totalt 17 tilsette, tre av desse er på full tid.
På onsdag i denne veka blei jubileet til butikken hans i Lundevegen markert med kaffi og kaker til kundane og besøk av administrerande direktør i Rema 1000, Christian Hoel.
– Den dagen gjekk omsetninga opp med 30 prosent i forhold til same dag i fjor, til 238.000 kroner, avsluttar Rune Digranes Bøen.