Herold

Like før klokka 18.00 onsdag kveld vart politiet varsla om ein trusselsituasjon på Husevågøy utanfor Måløy.

– Éin mann skal ha truga ein annan mann med eit våpen. Politiet er på staden og har kontroll. Ingen er skadd, opplyser operasjonsleiar Knut Dahl-Michelsen i Vest politidistrikt.

Politiet er i gang med etterforsking på staden for å kartlegge hendingsforløpet.

Dei involverte vil bli avhøyrde, og det vil ikkje bli gitt fleire opplysningar før det er gjort, seier operasjonsleiaren.

Det Dahl-Michelsen kan seie noko om, er at politiet rykte ut med fleire patruljar då hendinga vart meldt klokka 17.55. For å kome seg dit måtte dei ha assistanse av ferje, redningsskøyte og båt.

– Korleis vart de varsla om hendinga?

– Det vil eg ikkje kommentere på noverande tidspunkt av omsyn til etterforskinga.

– Har det vore vitne til hendinga?

– Det kan hende, men det er noko av det vi no ønskjer å finne ut av.

– Er dei involverte kjende for politiet frå før?

– Det har eg ingen kommentar til.

Det er per 21.50 ikkje tatt stilling til om nokon skal pågripast.

Kart med ID 516858