Herold

Berre 13 russarar fekk klarsignal til å delta i OL, men Russland deler ut millionar i OL-bonus til langt fleire utøvarar.

Det er tradisjon i Russland (og mange andre land) at medaljevinnarar i OL får pengepremiar.

Vladimir Putins fullskala invasjon av Ukraina i 2022 har gjort at Russland er utestengt frå OL. I 2024 og 2026 har enkelte russarar fått delta – om dei har tilfredsstilt krava om at dei ikkje er ein del av militæret eller andre sikkerheitsorgan, og at dei ikkje har drive propaganda for krigen.

Nå offentleggjer Russland sin olympiske komité at 116 utøvarar får OL-bonus, 103 av dei var aldri i OL.

Til saman får dei fleire millionar i bonus.

Meiner ordninga er rettferdig

– Vi har tatt avgjerda om ei pengepåskjøning til alle olympiarar som ikkje kunne reise til leikane på grunn av internasjonale organisasjonar sine politiske svikefulle avgjerder, skriv Mikhail Degtjarjov, sportsminister og leiar i Russland sin olympiske komité, på Telegram-kanalen sin.

Utøvarane får opptil 500.000 rublar, tilsvarande rundt 60.000 norske kroner.

Så mykje får russarane i OL-bonus

Dette er pengepremiane russiske utøvarar får:

Gull: 500.000 rublar (60.000 norske kroner)

Sølv: 350.000 rublar (42.000 norske kroner)

Bronse: 250.000 rublar (30.000 norske kroner

Øvrige deltakarar: 150.000 rublar (18.000 norske kroner)

– På denne måten støttar vi ikkje berre dei som drog til Dei olympiske leikane, men også dei som ikkje kunne dra. Frå ståstaden vår er dette rettferdig, blir generalsekretæren i Russlands Olympiske Komité, Viktor Berezov, sitert på i russiske medium.

Derimot er det i russiske medium utydeleg korleis pengane blir fordelte. Dei går ut frå at tidlegare OL-vinnarar, som for eksempel skiprofilen Aleksandr Bolsjunov, får pengar som «olympisk meister», men det har ikkje komne fram noko om korleis yngre utøvarar, som av naturlege grunnar ikkje deltok i 2022-leikane, skal kompenserast.

I MOSKVA: Vladimir Putin gratulerer Paralympics-gullvinnar Ivan Golubkov i Moskva.

Evig debatt i Russland

Også etter Paris-OL i 2024 betalte den russiske staten ut pengar til utøvarar som kunne ha dratt til sommar-OL. Den gongen handla det om heile 245 utøvarar.

Ifølge sports.ru delte dei ut 200 millionar til 245 utøvarar i 2024.

Nyheita frå sportsministeren kom i samband med at OL-deltakarane var inviterte til mottaking i Moskva.

I Russland går det ein nærast evig debatt om kva som kjem til å skje med den internasjonale deltakinga til utøvarane framover. Jelena Välbe, som framleis er ansvarleg for langrennsdelen av skisporten, seier at ho ser fram til FIS-kongressen i juni.

– Eg håpar at vi kan begynne å vende tilbake, seier Välbe til Match TV.

RUSSISK LEIAR: Jelena Välbe.

– Eg håpar det blir mogleg å snakke med leiinga og medlemmene i FIS. Kanskje får vi vite kva dei tenker om Russland vil bli representert i internasjonale konkurransar.

Debatten har gått høgt i Russland om Bolsjunov ville ha hatt sjansar mot Johannes Høsflot Klæbo i OL.

Fleire, også utanfor Russland, ønsker å sjå duellen igjen.

På spørsmål om det er nokre utsikter til det, svarer Välbe:

– Med tanke på at IOC begynner å tine opp, må dei internasjonale organisasjonane også gjere det same. Alle avgjerder avheng trass alt i stor grad av korleis IOC opptrer. Akkurat nå er det mykje kritikk mot FIS, spesielt når det gjeld langrenn og herrekonkurransane, der det manglar konkurranse. På grunn av dette taper dei pengar og sponsorar. Tilskodarane dukkar heller ikkje opp like ofte, seier ho.