Herold

Utestader i Kinn kan få høve til å servere øl og vin langt utover natta dersom Stortinget endrar reglane under sommarens fotball-VM

Innbyggjarane i Kinn kan få moglegheit til å sjå nattkampane under sommarens fotball-VM med alkohol i glaset.

Frå 11. juni til 19. juli blir fotball-VM for herrar arrangert i USA, Canada og Mexico. På grunn av tidsforskjellen vil mange av kampane bli sendt midt på natta norsk tid.

Nasjonale styresmakter har derfor foreslått ei mellombels endring i alkohollova som gjer det mogleg å skjenke øl og vin utover dagens maksimaltid medan meisterskapet går. Om det forslaget går gjennom Stortinget er det opp til kvar enkelt kommune å avgjere om dei skal legge til rette for utvida skjenking medan Fotball VM går føre seg.

Vil greie ut endring

Helse-, sosial- og omsorgsutvalet i Kinn behandla saka i møte 24. mars. Her vedtok dei kommunedirektøren sitt framlegg om å greie ut ei mogleg mellombels endring av dei lokale skjenkereglane under fotball-VM.

Vedtaket vart gjort mot to røyster – Kjell-Arne Kvalheim frå Frp og Kjell-Jarle Oldeide frå Raudt stemte i mot forslaget.

Dersom lovendringa blir vedteken nasjonalt, ønskjer kommunen å opne for at skjenkestader som viser direktesende VM-kampar kan få skjenke alkohol i gruppe 1 og 2 – altså øl og vin – heilt fram til klokka 06.00 i perioden.

Berre innandørs

Forslaget gjeld berre for stader som viser direktesende VM-kampar for gjestene sine. Den utvida skjenketida vil berre gjelde innandørs, men dei reknar telt for å vere innandørs.

Uteservering skal framleis følge dei ordinære skjenketidene. Kinn kommune har i dag opna for skjenking av øl og vin fram til klokka 02.00.

Skal på høyring

Politikarane har no bede kommunedirektøren sende forslaget på offentleg høyring.

Utvalet vedtok samstundes å halde eit ekstraordinært møte før saka går vidare til kommunestyret. Planen er at kommunestyret skal ta endeleg stilling til saka i møtet 19. mai.

VM-feiring på Torget nattestid: – Vi seier ja

Sivert og Leander har sitt travlaste år: – Trivst du, går alt!

Nesten fullbooka i VM-teltet på Torget