Herold

Yrkesliva til begge to er prega av overraskande heilomvendingar. No er duoen dei siste skomakarane i Bergen sentrum.

(BA): – BA, kven er det?

Harald Valdersnes er i eit spøkande humør når vi melder vår entré. Vi er i Skomakerhuset i Torggaten. For ei veke sidan ringde han til BA sin tipstelefon.

– Eg tenkte jo at det ville vere hyggeleg om de kom på besøk, sa han.

Vi er ikkje vonde å be – det er jo snart påske.

– Litt tilfeldig

I verkstaden durar gamle støypejernmaskiner. Dei er frå 60- og 70-talet, lenge før Valdersnes tok over som sjef.

– At det var dette eg skulle drive med er eigentleg litt tilfeldig, forklarar skomakaren frå Radøy.

Då han var rundt 16 år drog han inn til byen for å få seg arbeid. Han jobba med transport av møblar for Møbelsentralen i Valkendorfsgate, før han byrja å jobbe på CCB-basen på Ågotnes.

Men i mellomtida hadde han blitt forlova med ei bergensk skomakardotter. Nokon måtte bli ved den famøse lesten, og det blei ikkje dottera.

– Det blei meg!

Etter ein månad med opplæring, var han klar til å overta lokalet som den gong låg i Nøstegaten. Sidan då har han drive Skomakerhuset.

Hund og katt

Bak i verkstaden står Mahmoud Khalil Mohammad og solar på med nokre solar. Han kom til Norge frå Aleppo i Syria i 2017. Før krigen braut ut, dreiv han sin eigen skofabrikk der nede saman med broren.

I 2017 fekk Valdersnes ein telefon frå Askøy kommune.

– Dei lurte på om eg hadde plass til nokon frå Syria på arbeidspraksis. Det sa eg «ja takk» til!

Då Mohammad kom, gjekk samarbeidet som hand i hanske. Eller, fot i hose er kanskje betre her.

Mohammad har jobba som skomakar med Valdersnes sidan 2019.

– Og no har de blitt gode venner?

– Nei! bryt begge to ut i kor.

– Vi er litt som hund og katt. Det blir litt krangel ein gong i blant, seier Valdersnes.

– Ja, og då trugar han meg med denne, seier Mohammad og mimar ei slagrøyrsle med ein av hamrane.

Begge ler. Vi ler også. Håpar det berre er ein spøk!

På motorsykkel

Medan vi «jazzar» inne i lokalet, kjem ein kunde inn. Sander Martinez skal reparere solen på et par Adidas-sko.

– Eg har ikkje vore her før, men har brukt skomakar andre stader i Norge. Eg synest det er viktig at ein har det i byen, seier kunden til BA.

Ofte kjem kundar inn med sko som har relativt små skader, gjerne på solen. Valdersnes fryktar at folk kastar sko som dei eigentleg er nøgde med, når dei heller berre kan bli reparert.

Drifta går stabilt ålreit, ifølge skomakaren, men kva tenker han om framtida?

– Det har eg ikkje tenkt så mykje på, seier 73-åringen.

– Eg trur eg skal halde på her og køyre motorsykkel frå Hanøy helt til eg blir 90 år!