To hovudvegar mellom aust og vest vart stengde: No er Hardangervidda open igjen
Påskeutfarten skaper problem fleire stader i landet. Både riksveg 7 og E134 blei stengde til seint fredag.
Mange har teke påskeferie og er kanskje på veg til hytta eller til svigers med fullasta bil.
Statens vegvesen reknar dagen i dag som den mest hektiske utfartsdagen.
Samstundes har aksjonen «Dieselbrølet» ført til saktegåande trafikk fleire stader i landet.
Fredag ettermiddag blei to hovudvegar stengde etter trafikkulykker, og medførte lange ventetider i begge retninger.
Like etter kl. 22.00 melder Vegtrafikksentralen at Hardangervidda har opna igjen etter fire timer, medan E134 er framleis stengd.
Her kan du sjå status i din del av landet:
Aust: Meir trafikk ut mot hyttefelta
Hos Vegtrafikksentralen øst, som dekker Akershus, Østfold og Innlandet, er det uvanleg stille, ifølge trafikkoperatør Tilia Mathre.
– Vi har ingen hendingar som påverkar trafikken akkurat nå, det er trafikk på veg ut frå Oslo og på E6, som har vart i noka timar, seier.
Klokka 17.20 melder ho om ein del trafikk på E6 nordover, men også ein del ved Lillehammer.
– Det er veldig stille til å vere påskeutfarten.
Påsketrafikken er i gang i store delar av landet, mellom anna i Oslo.
Her du sjekke oppdaterte trafikkmeldingar.
Om du vil unngå kø og mykje trafikk, kan det vere lurt å unngå hovudfartsvegane, seier Mathre til NRK.
– Her blir det fort kø, seier ho og viser til E6 til Lillehammer, riksveg 7 mot Hallingdal, riksveg 25 mot Trysil og E16 mot Valdres.
– Har du tips til folk som skal ut på vegane?
– Følg med i trafikkbildet og bruk gjerne appen vår. Om du skal over fjellovergangar, så er det lurt å sjekke vêr og føre før du køyrer, seier Mathre.
Kor er trafikken? På E16 ved Tyrifjorden i Buskerud er vegen tom.
Også ferjetrafikken får ein del trykk, mellom anna Moss–Horten.
Administrerande direktør i Torghatten, Øyvind Lund, seier dei er godt rusta til påsketrafikken. Alle dei fem fartøya deira vil vere i rute når trafikken er venta å vere høg.
Dei har også ekstra mannskap på plass dagane med mest trafikk, fortel Lund.
Han reknar med dette vil verte fredag, onsdag og første og andre påskedag.
Sør: Forventar meir trykk utover
– Trafikken flyt for det meste ganske fint, med unntak av ulykka på E134, seier trafikkoperatør i Vegtrafikksentralen sør, Anniken Island til NRK.
Dei dekker Agder, Vestfold, Telemark og Buskerud.
Klokka 16.22 meldte naudetatane om at det har vore ei front mot front-ulykke E134 ved Brunkeberg.
Her er det lange køar som følgje av hendige, ifølgje Island. Trafikken dirigerast om på staden, bekreftar ho. Vegen er venta å ikkje bli opna før kl. 00.22 natt til laurdag.
På E134 har òg bilar som deltek i «Dieselbrølet» ført til kø.
– Det dreier seg om forseinkingar på om lag ti til tolv minutt, og det toler folk som regel, seier trafikkoperatør Island.
Klokka 18.39 melder Vegtrafikksentralen at riksveg 7 Hardangervidda er stengt etter ei trafikkulykke rett over grensa til Buskerud. Det er ikkje meldt om alvorlege personskadar.
Ifølgje Vegtrafikksentralen vil ikkje vegen opnast før kl. 22.40 i kveld.
Kl. 22.00 stadfestar Vegtrafikksentralen at riksvegen er opna i begge retningar.
Klokka 19.15 meldte naudetatane om ei alvorleg ATV-ulykke i Tønsberg, der ein mann omkom.
Trafikken flyt betre ei dryg time etter ulykka på E134 fredag ettermiddag.
Trafikkoperatør Ole-Petter Ruud seier dei forventar ein del trafikk utover påska, men at vêret påverkar kvar køane blir lengst.
– Om det blir snø og folk reise på fjellet, så pleier det å verte ein del trafikk på E16 Sandvika inn mot Hønefoss. Men om det blir lite snø, så trekke folk sørover. Då kan trykket kome gjennom Drammen og forbi Porsgrunn sørgåande.
– Her kan det fort verte ein flaskehals, seier Ruud.
Her er det fare for å bli ein flaskehals, ifølgje trafikkoperatøren. Men på E16 ved Porsgrunn flyt trafikken godt.
Han legg til at det fort kan verte ein del forseinkingar, men ber folk om å ikkje stresse.
Påskeutfarten plar spreie seg utover, men heimereisedag er så å seie alltid søndagen.
– Sjølv om vêret er fint, så blir folk ikkje verande til måndagen, sjølv om dei kanskje er tent med det med tanke på kø, seier Ruud.
Vest: Trafikken aukar på
På Vestlandet står det bra til på vegane, men trafikken har begynt å ta seg kraftig opp fredag kveld.
Det seier trafikkoperatør Marianne Hove til NRK.
Vegtrafikksentralen vest dekker Rogaland og Vestland.
Særleg tek det seg opp med trafikk i bergensområdet, men det er også ein del utfart nordover mot Hylkje, samt ein del tett trafikk Vågsbotn til Arna og Nesttun til Arna.
På ferjesambandet E39 Lavik–Oppedal er det sett inn ei ekstra ferje fram til klokka 21.00 fredag kveld. Utanom dette, har ikkje Vegtrafikksentralen blitt varsla om særleg utfordringar i ferjetrafikken.
Tradisjonelt er E16 Trengereid eit kritisk knutepunkt, men også mot Hylkje og mot Sogn, kan det fort verte ein del kø, seier Hove.
På E16 ved Trengereid i Vestland pleier det å vere mykje trafikk i påskeutfarten No er vegen nærmast tom.
Trafikkoperatøren minner om at ein del ferjesamband kan ha auka pågang i påska, og at det fort kan verte ein del ekstra ventetid.
Om du skal ut og fly, kan det vere greitt å vite at Bergen lufthavn går inn i ei påske med rekordstor utfart. Totalt ventar dei 230.000 passasjerar denne påska, der særleg utanlandstrafikken har ein oppsving.
– Det blir travle dagar, men vi er godt bemanna og førebudd på den auka trafikken, seier lufthamndirektør Helge Eidsnes i ei pressemelding.
Han ber folk om å møte opp i god tid.
Midt: – Mindre trafikk utover dagen
– Her går det veldig bra. Det er jamt med trafikk, men ikkje noko ekstraordinært, seier trafikkoperatør Henrik Haugland i Vegtrafikksentralen midt.
Han sit med ansvar for Møre og Romsdal og i Trøndelag.
Medan trafikken har teke seg opp mange stader, har det derimot blitt mindre trafikk i denne delen av landet dei siste timane.
På E6 ved Heimdal i Trøndelag flyt trafikken godt.
Dei siste åra har utfarten jamna seg ut, noko som gjer til at det ikkje blir for mykje kork enkelte dagar, fortel Haugland.
Men ekstra trafikk blir det alltids ut frå Trondheim i retning Stjørdal og Værnes. Også E39 mot Orkanger og sørover ut frå Trondheim er stader det kan verte ein del kø.
Nord: Store utfordringar med stengd tunnel
Vegtrafikksentralen nord dekker Nordland, Troms og Finnmark.
Den aller største utfordringa er stenginga av Raudhammartunnelen på E6 i Nordlands, som blei stengd natt til fredag etter at ein russebuss stod i full fyr.
– Det blir ei langvarig stenging og det er ingen lokale omkøyringsmoglegheiter, så folk må køyre om Sverige. Og denomkøyringa er veldig lang, konstaterer trafikkoperatør Monika Stane fredag ettermiddag.
Tunnelstenginga deler landet i to og fører til ekstra krøll for påskeutfarten.
I ettermiddag blir det sett inn to nye ferjesamband for å avvikle trafikken nordover, Bodø-Svolvær og Bodø–Skutvik.
Men fredag kveld kjem Vegtrafikksentralen med godt nytt til alle bilistar: E6 vil opne att laurdag.
I nord skaper tunnelstenging og glatte vegar litt krøll, men elles står det bra til på vegane. Her frå Gandvdikbakken E6 i Finnmark.
Glatte vegar førte fredag ettermiddag til at fleire køyretøy køyrde utfor ved Takelvdalen i Målselv kommune.
– Er det stader det kan kome ein del kø utover i påska?
– Vi pleier ikkje ha så lange køar her i nord, seier trafikkoperatøren, som oppmodar folk om å følge med på vêr og føre.