Herold

Stortingsfleirtalet har vedteke Høgres forslag om å fjerne vegbruksavgifta på bensin og diesel mellombels.

NPK: Senterpartiet stemde saman med dei borgarlege partia Høgre, Frp og KrF og sikra fleirtal for kutta.

– Vi folkevalde har som jobb å lytte, sa Sp-leiar Trygve Slagsvold Vedum då saka vart debattert.

Han viste til at folk opplever at avgiftene er for høge, kostnadane blir for dryge. Stortinget stemmer torsdag over 23 forslag knytte til dei høge bensin- og dieselavgiftene. Eitt av dei er fremja av Høgre, og går ut på å fjerne vegbruksavgifta på bensin og diesel mellombels frå april til september.

Over 4 kroner literen

Det vil bety eit kutt i pumpeprisen på 4,7 kroner per liter på bensin og 2,85 kroner på diesel inkludert moms. Vidare foreslo Senterpartiet å mellombels kutte i CO₂-avgifta for fiskeflåten, for skip i innanriks kvotepliktig sjøfart, for anleggsdiesel og autodiesel. Dette sikra også dei same partia støtte til.

Dei nye CO₂-avgiftene for næringslivet er foreslått slik:

– fiske og fangst i nære og fjerne farvatn: kr 0 per liter.

– innanriks kvotepliktig sjøfart: kr 0,90 per liter.

– autodiesel: kr 3,09 per liter.

– anleggsdiesel: kr 1,92 per liter.

– innanriks sjøfart: kr 3,17 per liter.

– 270 kroner per tank

Senterpartiet skriv i ei pressemelding at dei har rekna seg fram til at forslaga dei fekk fleirtal for utgjer eit samla avgiftskutt på 270 kroner per tank. Reknestykket er gitt at det er lik marknadspris og at tanken er på 60 liter.

– Eg er også glad for at avgiftene på vanleg diesel no blir redusert med 4,51 kr/liter – like mykje som på bensin, seier Sp-leiar Trygve Slagsvold Vedum.

Stoltenberg åtvara

Finansminister Jens Stoltenberg åtvara mot Høgres forslag frå talarstolen i Stortinget. Han peika på at forslaget ikkje er finansiert i statsbudsjettet og vil auke oljepengebruken.

– Høgres forslag vil koste 3,3 milliardar kroner, og det føreset at avgifta blir igjen auka den 1. september. Varer det ut året kostar det 8 milliardar kroner, påpeika Stoltenberg.

Han åtvara også mot fleire av forslaga frå Senterpartiet, om kutt i avgifter for næringslivet.

– Det ligg ytterlegare forslag som ser ut til å få fleirtal med store økonomiske konsekvensar. Heller ikkje desse kutta er finansierte, og har ein kostnad på 8 milliardar kroner på årsbasis, sa Stoltenberg.

Sjølv om Ap er imot desse forslaga lovar Stoltenberg at regjeringa vil følgje opp eventuelle vedtaket frå Stortinget.

– Vi vil følgje opp Stortingets vedtak. Samstundes vil vi forsikre oss at dette blir gjort på ein forsvarleg måte og ikkje i strid med andre føresegner og vedtak Stortinget har gjort. Vi vil kome tilbake til Stortinget for å sikre ansvarleg gjennomføring av forslaga, seier Stoltenberg.

– Mellombels

Høgre-leiar Ine Eriksen Søreide viste i debatten til at bensinprisane somme stader har vore oppe i 30 kroner literen.

Ho understreka at det er eit mellombels kutt.

– No forventar vi at regjeringa følgjer opp vedtaket raskt sånn at folk og bedrifter får redusert pumpeprisen allereie neste veke, sa Søreide. Hans Andreas Limi i Frp viste til at Noreg både har høg inflasjon og eitt av dei høgaste rentenivåa i Europa. – Det er ikkje trygg økonomisk styring og ikkje forhalde seg til folk og bedrifter og utfordringane deira i kvardagen, sa han. Frp stilte seg også bak Høgres kuttforslag, men ønskte også at det skulle vare heile året ut.

Vil ha fleire tiltak

Raudt stemde mot Høgres forslag til fordel for sitt eige, men er fornøgde med at det vart fleirtal for noko.

Mímir Kristjánsson seier i ein skriftleg uttale til NTB at Raudt no vil setje seg saman med Ap, SV, Sp og MDG for å diskutere fleire tiltak.

– Denne krisa har så vidt starta, og har ikkje vorte løyst i dag. Folk blir ramma knallhardt av dei skyhøge prisane, både på bensin og diesel, men også på mat og straum, seier Raudt-politikaren.

Mange diesel- og bensinbilar

Sjølv om elbilandelen i Noreg har auka kraftig dei siste åra, er det framleis klart flest personbilar som går på fossilt drivstoff. Ved utgangen av 2025 var det registrert 676.000 personbilar som går på bensin, 943.000 personbilar som går på diesel og 945.000 personbilar som går på elektrisitet, ifølgje Statistisk sentralbyrå. Dermed går framleis 63 prosent av den norske personbilparken på fossilt drivstoff.