Herold

To svenske statsborgarar er pågripne etter å ha oppsøkt eldre med påtrengande rosesal. No er politiet ferdig med saka.

Dei siste dagane har fleire eldre fått besøk av to personar som forsøkte å selje roser. Fleire har skildra dei som påtrengande og ubehagelege.

Blomsterseljarane vart pågripne tysdag ettermiddag.

Onsdag opplyser etterforskingsleiar Elias Demac til Firda at det dreier seg om svenske statsborgarar, som no blir utviste til Sverige.

– Konsekvensen blir at dei ikkje kan komme til Norge på fleire år, men kva tidsperiode det er snakk om veit eg ikkje. Det her er ein ganske streng reaksjon, seier han.

Ikkje funne pengane

Demac fortel at det vart oppretta ei straffesak for bedrageri og tjuveri. Politiet har valt å avgjere saka med førelegg, og arbeider no med utvising til Sverige.

– Det betyr at vi får avgjort saka raskt, og begge to har vedteke førelegget, seier han.

– Har de funnet pengar i bilen?

– Nei, vi har ikkje funnet noko av verdi. Og vi meiner at vi har sjekka dei stadane som er relevant å sjekke. No tenker vi at det at dei blir utvist er eit godt punktum i saka, seier Demac.

– Så då blir det ikkje gjort meir?

– Nei, det blir det ikkje. Det er ikkje snakk om store verdiar, og kjernen i saka er at dette har vore eit aggressivt sal, som har gjort mange utrygge, seier han.

Mange meldingar

Demac seier politiet ikkje kan utelukke at dei to gjerningspersonane har hatt medhjelparar, men at dei har fått fleire samstemte skildringar av både køyretøy og personar.

– Inntrykket vårt er at dei opererte åleine, men vi kan ikkje vite sikkert. Vi har i alle fall ikkje fått inn nye telefonar om liknande hendingar, seier han.

– Når det stod på så fekk vi veldig mange telefonar, legg Demac til.

– Snakkar vi fleire titals?

– Ja, og mange av dei ringde på vegner av fleire, seier han.

Demac fortel at slike hendingar skjer årleg, og at dei i andre delar av landet kan vere endå vanlegare. Han meiner utvising er eit viktig verkemiddel for å førebygge liknande saker.

Saker knytt til blomsterseljarane:

Fleire møte med pågåande blomsterseljarar. Politiet ber no om tips

Plutseleg stod blomsterseljaren i stova: – Ho blei så redd

Åtvarar: – Ikkje slepp dei inn

Aggressive roseseljarar pågripne: – Ikkje sikkert vi finn ei einaste krone