Herold

Politiet etterlyste denne bilen onsdag. No er bilen funnen og ein person er pågripen etter tips frå publikum.

(FIRDAPOSTEN): OPPDATERT: Etter at denne saka blei publisert har politiet fått fleire tips frå publikum. Desse har ført til at bilen no er funnen.

– Takka vere gode tips frå publikum har vi funnet bilen, og arrestert ein person, seier etterforskingsleiar Elias Demac.

Utover at personen vil bli avhøyrt av politiet kan ikkje Demac gi opplysingar utover dette på det noverande tidspunkt.

Elias Demac tok onsdag ettermiddag kontakt med Firdaposten. Han bad om hjelp til å etterlyse ein bil, og be om hjelp frå publikum.

Det er ein grå varebil av typen Peugeot Expert. På sida står det Hopen Utleige, Bruktbilutleige, og eit telefonnummer. Politiet understrekar at etterlysinga skjer i samråd med bileigaren.

– Vi har fått løyve av bileigar til å gå ut med ei etterlysing. Det er ein leigebil som er på avvegar, og den er truleg involvert i fleire straffbare forhold, sa Demac.

Demac fortel at det dreier seg om vinningskriminalitet.

– Det vart brukt leigebil i saka med den båten som forsvann, er det ein av sakene der denne bilen kan vere involvert?

– Det er korrekt, stadfestar etterforskingsleiaren.

– Vi trur at bilen er i området Kinn-Sunnfjord, og vi treng hjelp frå publikum til å finne den, legg han til.

Saka blei oppdatert med ny informasjon klokka 16:05.