Herold

600 senger, Johnny Sandåker, tolv tappetårn og familien Roalstad står klare til å ta imot mengder med påskegjester om få veker.

– Det er fullbooka. Det har det vore lenge, seier syskenparet Silje og Bjørn Robin Roalstad.

Opnar ølkranene klokka 10.00

Snart blir alle leilegheitene ved Gautefall skisenter fylt opp med påskeklare gjester. Den største dagen er skjærtorsdagen på Rytterspranget kafé. Då opnar Roalstad-familien og dei tilsette ølkranene klokka 10.00.

– Gjestene prøvar å sikre seg bord alt frå klokka 08.00. Då har fleire av dei gjerne vorsa i grendene i Bostrak, Tørdal og Henseid, men også i Bø, Gjerstad og Nissedal også, frå klokka 06.00, seier Silje.

Når det er på tide å finne senga att etter enda festdag har Bjørn Robin ordna med fem limosiner frå VIP Taxi Kristiansand. Dei står klare til å frakte gjester trygt heim heile påskehelga.

– Me skal få folk trygt heim torsdag til laurdag, seier Bjørn Robin.

600 festglade på dagtid

På dagtid går det for seg på Rytterspranget – på kveldstid er det afterskien som gjeld.

– Det er 600 menneske her på dagtid. Det er ikkje utseld ennå, men me anbefaler å skaffe billett medan det framleis er å få tak i, seier syskenparet.

Bjørn Robin tek ein pust i bakken mellom ein særs vellykka vinterferie og påska. Han ladar batteria og får seg litt farge i Torremolinos i Spania, så han er med på intervjuet over telefon.

– Vinterferievekene var ein suksess. Me hadde oppe totalt 23 dagar i strekk inkludert helgene, seier Silje og Bjørn Robin.

Gratis konsertar med Johnny

– Påska på Gautefall blir ein fin avslutting på ein fantastisk vintersesong før folk skal ned til kysten eller ut på Toke, seier Silje.

Konsertane på dagtid er gratis. Då er det Johnny Sandåker som held liv i gjestene på terrassen på Rytterspranget kafé.

– Johnny har vore her 15 år på rad nå. Generasjonar har sett han her på Gautefall. Sjølv om regnet spruta i fjor, så var det stappfullt, seier Silje.

Familien Roalstad bygger opp ein heil påskefestival rundt Rytterspranget kafé med benkar, gjerde og festivaltoalett som blir tømt kvar dag av Kragerø septikkservice. I tillegg satsar serveringsstaden stort på godt vakthald.

Mammas heimelaga lapskaus

– Det gjekk på dagtid 15.000 glas øl på terrassen på Rytterspranget kafé i fjor påske. Me har åtte tappetårn ståande klare til årets påske, seier Bjørn Robin.

– Det blir også i år servert mammas heimelaga lapskaus med flatbrød og tyttebær. Det er ein slager. Me har prøvd andre ting, men det er den folk vil ha, seier Silje.

Syskenparet fortel at det er duka for skiglede, påskemusikk med allsong og eige barneprogram i påska.

– På påskeeftan blir det gøymd 400 påskeegg med godteri, så det er bare å leite. Det blir også barnedisco, med barnedrinkar og elgen Helge, avsluttar Silje.