Herold

Aalesund slo tilbake mot Viking og er klare for semifinale i cupen etter ein sterk 2. omgang.

Viking har fått ein verst tenkeleg start på sesongen etter fjorårets gullsesong.

I første serierunde laurdag blei det 2–1-tap for HamKam.

I NM-kvartfinalen mot Aalesund i Stavanger i kveld håpa dei mørkeblå på revansje.

I staden blei det ein ny nedtur og cup-exit etter 2-1-tap for Aalesund.

– Me ønska veldig å gå vidare til semifinalen, men Aalesund straffar oss. Me har nok sjansar til å få 2-2, men er ikkje dyktige nok. Då er det fortent at Aalesund går vidare, seier Viking-trenar Morten Jensen til NRK etter kampen.

– Det er skuffande at det vart tap. Eg synest prestasjonen i 2. omgang var altfor dårleg. Det er eit lag utan sjølvtillit no, sa Viking-kaptein Zlatko Tripic til TV 2 etter kampen.

Viking starta best

Det var likevel Viking som kom best i gang i oppgjeret.

Rogalendingane gjorde sju endringar frå seriekampen mot HamKam i helga. Ein av spelarane som fekk tillit frå start var Ola Visted.

Den 20 år gamle kantspelaren fekk nettsus etter eit kvarter. Eit hjørnespark fall ned i feltet og Visted fekk avfyrt eit skot mot mål utan at nokon oransjekledde greidde å klarera.

Målet vart det einaste før pause.

Viking-spelar Vetle Auklend fortvilar i NM-kampen mot Aalesund.

Tjue minutt etter kvilen utlikna Aalesund.

Også den skåringa kom etter eit hjørnespark. Ulrik Syversen steig til vêrs i feltet og stanga ballen via ryggen på lagkamerat Marius Andresen og i mål.

Aalesund snudde kampen ti minutt seinare. Mathias Christensen førte ballen inn i 16-meteren og fann ein veg til nettmaskene.

Det vart den avgjerande skåringa som sikra sigeren for Rekdal og co.

– Me vågar for lite i starten av kampen, så losnar det inn mot pause. I andre omgang gjer me ein bra halvtime når me snur kampen, så blir det beintøft mot slutten når Viking køyrer på med alt dei har, oppsummerer Aalesund-trenar Kjetil Rekdal overfor NRK.

– Det er sterkt å vinna her for eit nyopprykt lag. Me må læra fort og gleda oss over det me har fått til i dag, held den profilerte trenaren fram.

Aalesund-trenar Kjetil Rekdal var ein fornøgd mann etter kampen i Stavanger.

– Ekstremt stolt

Også Aalesund-kapteinen er glad for å ha sikra semifinaleplassen.

– Eg er ekstremt stolt. Måten me snur det i 2.-omgangen etter den 1. omgangen me spelar. Det er heilt fantastisk, sa Aalesund-kaptein Henrik Melland til TV 2 etter kampen.

Fjorårets serievinnar Viking var favorittar til å ta seg vidare til semifinalen.

Trenarane gjorde altså heile sju endringar frå laget som tapte seriepremieren mot HamKam.

– Angrar de eller måtte de gjera alle endringane på laget, Morten Jensen?

–Det er stor konkurranse på laget. Ein del ønska me å sjå, og så var det også tvungne byte fordi fleire ikkje kunne spela. Første omgang er eg godt fornøgd med, andre omgang er eg ikkje så fornøgd med.

– Prestasjonen til unge spelarar varierer veldig mykje. Forhåpentlegvis blir me betre framover. Me skal ikkje grava oss ned, men fokusera på serien, slår Jensen fast.

Nyopprykte Aalesund gjekk på eit 1-3-nederlag mot LSK i første seriekamp.

Aalesund står med to cupgull i historia. Begge under leiing av Kjetil Rekdal i 2009 og 2011.

KFUM – Fredrikstad, Bryne – Brann og Bodø/Glimt – Lillestrøm skal gjera opp om dei tre siste semifinaleplassane.