Herold

Arbeidet med å frese opp fylkesveg 51 over Valdresflye tek til denne veka. I år vil det bli tydelegare informasjon om parkering.

Driftsentreprenøren vil setje i gang med å frese opp vegen mellom Beitostølen og Maurvangeni løpet av veka, så fort vêret blir betre, opplyser fylkeskommunen i ei pressemelding.

Om alt går etter planen, og vêret blir bra, vil vegen bli klar til opning før påske.

I år vil fylkeskommunen sin entreprenør følgje ekstra godt med på trafikken og parkeringa.

– Når brøytemannskapa ikkje er opptekne med å brøyte eller med andre driftstiltak, vil dei køyre gjennom strekningen og sjå at trafikken går som den skal. Dette er viktig for at alle skal kome seg trygt fram, seier seksjonssjef Arne Fredheim i Innlandet fylkeskommune.

Vil unngå reprise av fjoråret

I fjor oppstod det trafikkaos på Valdresflye i påska. Det var lite snø lenger nede i terrenget, og påsketuristane søkte seg oppover i jakt på skiføre. Politiet måtte sette inn både helikopter og patruljar for å handtere situasjonen.

I år lover fylkeskommunen at informasjonen skal bli tydeligere. Den vil sette opp fleire nye skilt, og ha hyppigare tilsyn med trafikken på høgfjellsovergangen mellom Øystre Slidre og Vågå.

– Når det er dårleg med snø i lågareliggjande strøk, kan vi få stor trafikk av dagsturistar som vil gå ut på skitur frå Valdresflye. Dersom dei ikkje parkerer i tråd med reglane, kan dei hindre trafikken i å kome fram. Det kan vere farleg, derfor vil vi i år setje opp 14 parkeringsskilt og to informasjonsskilt, seier Fredheim.

Dei 14 skilta vil vise til lovlege parkeringsplassar. I tillegg vil fylkeskommunen setje opp to informasjonstavler som minner trafikantane på at det ikkje er lov å parkere langs vegen, der det ikkje er særskilde parkeringsplassar.

Open på dagtid

Fylkesveg 51 blir som vanleg open mellom klokka 08 og 20 alle dagane i veka den fyrste tida etter opning. Inntil vidare blir vegen nattestengd.

Viss det blir dårleg ver, kan vegen bli stengd på kort varsel.

– Vi kjem med meir informasjon om opninga, når vi veit meir om vêret og framdrifta til entreprenøren, opplyser Senior kommunikasjonsrådgjevar Kari Sofie Hermanrud hos fylkeskommunen.

Vil avverje nytt trafikkaos: – Folk har ein tendens til å parkere der de ønsker