Herold

Utover ei nødvendig satsing på å få rimelege hus og tomter, bør me og som innbyggarar og huseigarar ha fokus på å få omsett dei husa det ikkje bur folk i. Me kan ikkje berre sitta på internett og klaga på byråkrati, klimakrav og politikarar, me må og gå i oss sjølve. Spørja om det er ein god grunn til at huset skal stå tomt heile, eller store delar av året, når nokre få familiar til i bygda er det som skal til for at skyttarlaget , koret, eller korpset får nok rekruttering til å få leva vidare. Treng barnebarna eller onkelungane dine leikekameratar, i so tilfelle må dei ha ein heim!

Dei tomme husa er sjeldan for dårlege til at nokon vil ha dei, det er rikeleg med eksempel på kråkeslott på Instagram, der unge par brettar opp ermane og utviklar gode familieheimar. Det er i høgste grad gode mogelegheiter for å få omsett hus, verda har endra seg og folk søker tryggheit og eit liv med mindre avdrag hjå banken.

«Lag fleire ungar,» sa Erna Solberg i nyttårstalen sin 1.januar 2019. Noreg var heilt avhengig av å ha ein yngre generasjon for å halda på velferdsmodellen. Du finn ikkje nokon statistikk som tilseier at dei som bur i leilegheiter får fleire born enn dei som bur i hus, så om me skal få til det som Erna sa, må me og ha hus å tilby til dei som vil ha det.

På 70-talet hadde kvar familie om lag ein unge meir enn i dag, det utgjer veldig mange personar i ein grend! På bygda får me fleire ungar enn i byane, men ligging åleine er ikkje nok.