Herold

Vaksdal Røde Kors Hjelpekorps vil gjerne ha fleire frivillige til søk- og redningsoppdrag. Nestoperativ leiar Sondre Wiers håpar også at fleire i kommunen vil støtta arbeidet som støttemedlemmer.

Hjelpekorpset rykkjer ut når folk treng hjelp både i fjellet og i låglandet. Organisasjonen får oppdrag frå Hovudredningssentralen og AMK gjennom heile året.

- Me er ein god gjeng med engasjerte folk, men me har alltid plass til fleire, seier nestoperativ leiar i Vaksdal Røde Kors Hjelpekorps, Sondre Wiers.

Opplæring i førstehjelp

Dei frivillige møtest til medlemskveldar i korpshuset på Vaksdal. Her øver medlemmene på alt frå førstehjelp til bruk av kart og kompass.

- Her får ein både eit sterkt fellesskap og lærer mykje nyttig, seier Wiers.

Nye medlemmer får opplæring gjennom kurs og øvingar. Dei deltek på treningar og rykkjer ut på oppdrag når det oppstår behov.

Aktivitet på fjellet

Om vinteren brukar korpset snøskuter i tenesta. Dei øver då på pasienttransport, skredredning og å finna sikre vegval i terrenget. Hjelpekorpset fraktar også varer til hytter i Vaksdalsfjellet.

Korpset disponerer ei eiga hytte ved Buhellervatnet som fungerer som base for aktivitetane.

- Hytta er ein viktig base for oss når me er ute på øvingar og aktivitetar i fjellet. Samtidig er det ein fin samlingsplass for korpset, seier Wiers.

Viktige støttemedlemmer

I tillegg til aktive mannskap ønskjer organisasjonen seg fleire støttemedlemmer. Pengane frå kontingentane går til drift, utstyr og aktivitetar i lokallaget.

- Støttemedlemmer er svært viktige for oss, seier Wiers.

Folk som ønskjer å bidra kan ta kontakt med hjelpekorpset på Facebook eller melda seg via nettsidene til Røde Kors.