Herold

Ny asfalt hjelper lite dersom underlaget framleis er dårleg.

Det er bra at fylket no vil spandera asfalt på fylkesvegen sin gjennom Kvinnherad. Det skulle eigentleg berre mangla, for fleire av strekningane er i svært dårleg stand.

Vegpartiet frå Lundsneset til Ljosnes er eit godt døme på dette. Her er vegen så dårleg at det ikkje held å berre leggje ny asfalt oppå eit svakt underlag.

Det er nettopp i slike prosjekt sunn fornuft burde råda. I Kvinnherad går det føre seg tunneldriving mellom Fjellhaugvatn og Midtbotnvatn i regi av Sunnhordland Kraftlag. Her kjem det store mengder overskotsmassar av stein, ein ressurs som kunne vore brukt til å byggja opp att vegkroppen på dårlege vegstrekningar.

I staden ser det ut til at mykje av denne steinen blir gravd ned utan å bli brukt til noko nyttig. Dette er vanskeleg å forstå når vi samstundes har vegar som treng nett slike massar for å bli skikkeleg oppgraderte. Dette framstår som eit stort sløseri med gode ressursar.

Ny asfalt vil sjølvsagt vera ei forbetring på kort sikt. Men dersom underlaget er like dårleg som før, vil det berre gå nokre få år før vi er tilbake til same standard som i dag. Her burde vegstyresmaktene vore meir på ballen og sikra at lokale ressursar blir brukte der dei trengst.

Skal vi få varige løysingar, må underlaget bytast ut og byggjast skikkeleg opp. Då må fylket som er vegeigar også vera flinke til å bruka dei rimelege, kanskje gratis, ressursane som finst lokalt.

Dette handlar heilt enkelt om sunn fornuft: Bruka lokale ressursar, byggja skikkeleg når ein først gjer jobben, og sørgja for at skattepengane våre blir brukte på ein måte som gir varige resultat.

Dagens ris til vegvesenet