Herold

Det er mange «seld»-skilt å sjå i vindauga hos byens eigedomsmeklarar for tida.

Eigedomsmeklar Eline Knapstad hos Eiendomsmekler 1 bekreftar at det er bra trøkk i marknaden. I tillegg går vi no inn i ei tid der mange hus og eigedommar blir lagde ut for sal.

Sesongen byrjar no

– Vi merkar ein auka trend på tilflyttarar og folk som skal flytte heim. Dei tek kontakt i god tid og ønskjer å sikre seg bustad før dei flyttar. Det er mange unge som er på leit, og det er kjekt, synest ho.

Hus og leilegheiter som har blitt lagd ut no på nyåret har gått relativt raskt, seier ho.

– Men det er no hovudsesongen byrjar. Mange einebustadar med fine hagar kjem for sal når det er blitt vår og litt meir grønt og frodig ute. Og vi har hatt godt oppmøte på visningar i det siste, med mange påmelde.

Ho fortel vidare at eigedommane som har blitt lagde ut stort sett har gått med ein gong.

– Det har vore gode bodrunder og sal over takst på dei fleste fordi det er såpass godt oppmøte.

Kan bli utfordrande å kjøpe nytt

Men byggekostnadane har gått i taket dei siste åra. Sal av ein einebustad bygd på 1970-1980-talet betyr ikkje nødvendigvis lenger at ein sit att med nok midlar til ei nybygd leilegheit, sjølv om ein går ned i storleik.

– Skal du ha eit reint nybygg, kan det vere vanskeleg for nokre. Har du ein einebustad med rett beliggenheit, går det fint. Men for dei som har ein heilt vanleg einebustad kan det nok bli utfordrande.

I det vi snakkar med henne, står Knapstad og ventar på ein kunde for privat visning av ei leilegheit i Storåsvegen. Litt seinare på dagen får vi ein SMS der ho opplyser at både den og ei til har blitt selde etter private visningar.

– Bra aktivitet

Magnar Nilssen i Eiendomsmegler Norge bekreftar at det har vore god fart i bustadmarknaden i Florø ei stund.

– Det har det eigentleg vore gjennom heile fjoråret og til no. Så det er heilt rett.

I følgje han er det folk frå heile spekteret som ser seg om etter ny bustad.

– Det er alt frå dei yngste som skal ha sin første bustad, til dei som skal ha ein seniorbustad.

Likevel karakteriserer Nilssen eigedomsmarknaden som «normal».

– Det er bra aktivitet, det meste går ganske fort unna. Nokre blir likevel liggande av ulike grunnar. Populære objekt går fort uansett - dei som ligg litt lenger er det til dømes oppussing på. For det er færre i marknaden som vil pusse opp, no enn før.

– Når ein sel ein einebustad i Florø bygd på 1970-80-talet - kan ein rekne med å finansiere ei ny, mindre leilegheit på det salet?

– No har byggekostnadane auka voldsomt dei siste åra, så ei leilegheit kostar like mykje som ein einebustad. Men når ein reknar pris på einebustadar, ser ein på dei kvadratmetera ein har. I ei leilegheit er det ofte ein del ting som ikkje er med, som er felles for fleire. Då blir prisen høgare. Det kjem an på storleiken, men ei leilegheit kostar ofte like mykje som ein einebustad gjer i dag.

Liv Tips meg

Vil bygge blokker og småbåthamn ved Kanalen