Herold

Stadig meir utspekulerte svindlarar prøver å lura nordmenn som ventar på skattemeldinga, åtvarar Skatteetaten.

– Nytt i år er at enkelte har vorte kontakta på telefon med beskjed om å betala krav på Vipps. Skatteetaten vil aldri ringe deg for å be deg om å betala restskatt via Vipps, seier Ragna Fossen, leiar for tryggleik og beredskap i Skatteetaten, til NTB.

Skatteetaten åtvarar mot å trykkja på lenkjer. Dei sender aldri lenkjer du skal trykkja på i samband med skattemelding og skatteoppgjer.

– Om du får meldingar som ser ut til å vera frå oss, og som ber deg klikka på lenkjer for å betala, få pengar tilbake eller registrera skatteinformasjon, er det svindel, seier ho.

Når det kjem beskjed frå skattestyresmakta, må du sjølv skrive inn adressa i nettlesaren. Skatteetaten seier dei aldri sender lenkjene uoppmoda på e-post eller SMS. Dei ringjer heller ikkje uoppmoda i samband med skattemeldinga.

Tips for å ikkje bli lurt

Typisk døme

Kvart år blir det rapportert om svindelforsøk i samband med at skattemeldinga blir send ut. Her ser du nokre typiske døme.

Måndag byrja Skatteetaten å sende ut meldingane, men framleis er det mange som ikkje har fått ho. Mange har likevel fått e-post frå svindlarar som gir seg ut for å vera Skatteetaten. Fleire av dei ser proffe ut, med Skatteetatens logo og feilfritt språk.

– Skatteetaten er godt kjend med at det går føre seg svindel, og me åtvarar jamleg mot det. Svindlarar blir stadig meir utspekulerte når dei gir seg ut for å vera Skatteetaten. Me ser at dei kopierer både logo, visuell utforming og språk, seier Fossen. Regelen er altså å alltid sjølv gå inn på skatteetaten.no og logga seg inn der for å sjekka skattekort, skattemelding eller skatteoppgjer.

I fjor opplevde totalt 170.000 nordmenn å få identiteten sin misbrukt, og 340.000 til var utsette for forsøk på misbruk, viser tal frå NorSIS.

(©NPK)