Herold

Det finst ingen jernbanelinjer i Nordhordland, men det stoppar ikkje Miriam Louise Seim når ho no hoppar på Bergensbanen.

Kanskje det er irritasjonen over den lange reisetida mellom Bergen og Oslo som gjer at ho har takka ja til stillinga som sjeflobbyist for Forum Nye Bergensbanen.

Jernbaneturen mellom dei to største byane i landet tar i dag rundt sju timar. Den lange reisa over langfjella får mange til å føretrekke fly. Seim skal arbeide for å kutte reisetida med tog.

– Eg kjenner både Vestlandet og hovudstaden godt, og er ein hyppig brukar av togstrekninga, seier ho i ei pressemelding om jobbskiftet.

Dei siste åra har dama frå Seim opplevd mykje nytt. Det starta like før valkampen i 2019 då ho gjekk inn i politikken for Venstre.

Nokre år seinare, i 2022, landa ho jobben som politisk rådgivar for finansbyråden i Bergen. Den siste perioden har ho hatt arbeidsstaden sin på Løvebakken, som rådgivar for stortingsgruppa til Venstre.

Miriam trivast godt med kaos og valkamp

Andre skal sjå potensialet

I rolla som sjeflobbyist får Seim bruk for den politiske erfaringa si. Ho skal jobbe aktivt for at politikarane skal tenke meir på toget som går mellom vest og aust.

– Eg gler meg til å ta fatt på arbeidet for å sikre at Bergensbanen får merksemda den fortener.

I tida framover vil Seim løfte to hovudsaker i møte med politikarar i posisjon og opposisjon: Ringeriksbanen og oppgradering av strekninga Bergen-Voss.

Førstnemnde er jernbanestrekket som er planlagd å gå direkte frå Hønefoss til Sandvika i Bærum. I dag går toget ein lang og kronglete omveg om Drammen til og frå Oslo.

– Bergensbanen bind landsdelane saman. Jobben min blir å få resten av landet til å sjå det same potensialet som eg ser.

Gir eit klart løft

Hos Forum Nye Bergensbanen ser dei ein klar fordel med at dama frå Seim hoppar over frå politikken til deira lag.

– Miriam kjem til å bli ei sterk stemme for Bergensbanen, og det reflekterer godt trykket og iveren vi har for prosjektet, seier Christopher Amundsen Wand, leiar for organisasjonen.

Wand meiner tilsettinga av Seim er viktig for å nå det store målet dei har sett: At reisetida mellom Bergen og Oslo kryp ned til fire timar.

I dag blir det mykje klimakrøll når folk vel å ta fly heller enn å reise med toget.

– Kampen om dei store samferdsleprosjekta er politisk. Då treng vi folk som både forstår politikken og kan løfte saka tydeleg inn i den nasjonale debatten, seier Wand om løftet som Seim gir dei.