Herold

Meteorologane varslar ein tøff torsdag langs kysten med kraftig vind og mykje nedbør. Ei rekkje farevarsel er sendt ut.

Saka oppsummert:

– Meteorologane varslar kraftig vind og store nedbørsmengder torsdag 12. mars, med fare for vindkast opp mot 33 m/s. – Gult farevarsel er sendt ut for Vestlandet, Trøndelag og Innlandet, medan Spitsbergen kan få full storm. – Oransje farevarsel for snøskred er ferda ut for indre strok av Hordaland, Sogn og Fjordane og Sunnmøre. – Folk blir oppmoda om å sikre lause gjenstandar, unngå unødig ferdsel og vere budde på stengde vegar og mogleg straumbrot. – Vind og nedbør vil skape utfordrande forhold både på vegane og til sjøs. – Snøskredfaren aukar grunna kraftig fokksnø og stigande snøgrense som gjer snødekket ustabilt.

Oppsummeringa er laga av ei KI-teneste frå OpenAI. Innhaldet er kvalitetssikra av NRK sine journalistar før publisering.

Det er duka for ein svært uroleg torsdag over store delar av Sør- og Midt-Norge, samt på Spitsbergen.

Meteorologane varslar ein kombinasjon av kraftig vind og store mengder nedbør som vil skape utfordringar for både fastbuande og reisande.

Det er sendt ut gult farevarsel for delar av:

• Vestlandet (Vestland og Møre og Romsdal)
• Trøndelag
• Innlandet

I tillegg er det ei rekke farevarsel for snøskred denne veka.

– Opp mot sterk storm

– På kysten kan det bli full storm, til og med sterk storm. I tillegg kan det lokalt bli kraftige vindkast på 27–33 m/s, seier Leonidas Tsopouridis ved Meteorologisk institutt til NRK.

Vinden vil kome frå sør og søraust. Vindel vil auke først i nord og minke først i sør.

– Torsdag blir den verste dagen denne veka.

Varselet gjeld frå klokka 04 til klokka 21 torsdag 12. mars, og folk blir rådde til å sikre lause gjenstandar, vurdere tiltak for å avgrense skade og å unngå unødig ferdsel på utsette stader.

– Enkelte vegar kan bli stengde på grunn av tre eller andre objekt i vegbana. Straumforsyninga kan òg bli påverka.

Meteorologisk institutt har sende ut gult farevarsel om kraftige vindkast for delar av Vestlandet. Varselet gjeld frå klokka 04 til klokka 21 torsdag 12. mars.

Dramatisk vindutvikling langs kysten

Verst ser det ut til å bli på Vestlandet.

Frå torsdag morgon vil vinden auke til liten storm på kysten av Hordaland og Rogaland. Lenger nord, ved Stad, er det venta sterk storm utover dagen.

Også i nord dreg det seg til. På Spitsbergen er det meldt om full storm utsette stader frå torsdag ettermiddag. Sjølv på Austlandet, som ofte ligg meir i le, vil vinden merkast godt med sterk kuling på kysten utover kvelden.

Det er også sendt ut gult farevarsel for jord- og sørpeskred på Vestlandet og deler av Rogaland og Agder.

Varselet gjeld frå torsdag ettermiddag og fram til fredag morgon.

Folk blir bedne om å halde seg unna bratte skråningar, bekkar og elvar.

Oransje farevarsel for snøskred

Samstundes som vinden herjar langs kysten, aukar faren for snøskred dramatisk i fjella. Det er sendt ut oransje farevarsel (nivå 3) for fleire regionar, særleg i indre strok av Hordaland, Sogn og Fjordane og på Sunnmøre.

Folk blir bedne om å vere forsiktige i leområde med fersk fokksnø.

Årsaka til den auka skredfaren er todelt:

• Kraftig fokksnø: Mykje nysnø kombinert med sterk vind legg att farlege flak i lesidene.
• Stigande snøgrense: Utover dagen vil snøgrensa stige til mellom 600 og 1000 meter. Når det kjem regn på toppen av tørr snø, blir snødekket tungt og ustabilt, noko som kan føre til naturleg utløyste skred.

Oversikt over vêret torsdag 12. mars:

• Vestlandet: Sterk storm ved Stad, liten storm elles på kysten. Mykje regn og stigande snøgrense.
• Fjellet i Sør-Noreg: Snøfokk og vanskelege køyreforhold. Sterk kuling til liten storm.
• Austlandet og Agder: Lokal tåke og opphald først på dagen, før regnet og vinden set inn for fullt frå ettermiddagen.
• Nord-Norge: Tilskya vêr med aukande søraustleg sterk kuling i Nordland og Troms utover kvelden.
• Spitsbergen: Full storm utsette stader og spreidd snø i sør.

Vindkast på over 30 m/s er statistisk sett sjeldne, men langt frå ukjende langs den vêrharde norskekysten.

Dette er vindstyrkar som krev at folk sikrar lausgjenstandar raskt. Med kraftig vind i kombinasjon med store nedbørsmengder, kan det bli utfordrande forhold både på vegane og til sjøs.

Sjekkliste for sterk storm

Når ein kombinerer sterk storm med mykje regn, aukar risikoen for både bygningsskadar, vasskadar og straumbrot.

Her er dei viktigaste punkta for å trygge heim og eigedom:

Sikre avløp og takrenner:

• Fjern lauv, kvist og rusk frå takrenner og nedløpsrøyr.
• Sjå til at rister over sluk i gardsrom eller utanfor kjellarnedgangar er opne. Når det kjem 50 mm regn, skal vatnet ein stad, og tette avløp fører raskt til kjellaroversvømming.

Utandørs sikring:

• Flytt hagemøblar, lause krukker, gassgrillar og trampolinar inn i garasjen eller bind dei fast.
• Sjekk at presenningar over båtar, vedstabel eller bilar er stramma maksimalt. Vinden vil prøve å ta tak i lause kantar og kan rive sund både stoffet og festepunkta.

Vindauge og dører:

• Sjå til at alle vindauge (særleg takvindauge) og dører er forsvarleg lukka og låste. Ein dør som blæs opp i sterk storm, kan føre til store strukturelle skadar på bygget på grunn av trykkendringar.

Båthamna:

• Har du båt på sjøen, bør du leggje på ekstra fortøyingar og sjekke at fendarane ligg rett. Sterk storm frå sør/søraust kan gje uvanleg stor sjøgang i hamner som vanlegvis ligg i skjul.

Førebu deg på straumbrot:

• Kraftig vind kombinert med tungt regn aukar sjanse for at tre fell over straumlinjer. Lad opp mobiltelefonar og powerbankar, og ha lommelykt med friske batteri lett tilgjengeleg.

Trafikk og køyring: