Kongen returnerer til Noreg etter sjukehusopphald på Tenerife
Kong Harald og dronning Sonja landa laurdag kveld på Gardermoen, etter eit opphald på Tenerife. – Kongen er i god form, skriv Slottet.
Saka oppsummert:
- Kong Harald og dronning Sonja landa laurdag kveld i Noreg etter ein ferie på Tenerife
- I løpet av ferien blei kong Harald lagt inn på sjukehus på grunn av infeksjon og dehydrering
- Kronprins Haakon har fungert som regent medan kongeparet var på ferie
- Kongeparet sitt neste offisielle oppdrag er 12. mars, der dei skal ta imot utanriksminister Espen Barth Eide
Oppsummeringa er laga av ei KI-teneste frå OpenAI. Innhaldet er kvalitetssikra av NRK sine journalistar før publisering.
Laurdag er kongeparet heime i Noreg etter eit ferieopphald på Tenerife i Spania.
Under ferien blei kongen innlagd på sjukehus for infeksjon og dehydrering.
– Kongen er i god form, og vil etter planen halde fram sitt arbeid til veka, skriv Slottet i ei pressemelding.
Også kongen sin livlege Bjørn Bendz reiser tilbake saman med kongeparet.
Kongen fylte 89 år 21. februar.
Før turen til Spania var kongeparet til stades under OL i Italia.
Sjukehusopphald på Tenerife
Det var i slutten av februar at kong Harald blei lagt inn på universitetssjukehuset Hospiten Sur på Tenerife i Spania.
Det skjedde under kongeparet sin private ferietur til øya.
Kongen sin livlege reiste ned til Tenerife for å hjelpe det lokale helsevesenet.
– Tilstanden hans er etter forholda god, skreiv Slottet i ei pressemelding kort tid etter innlegginga.
Kronprins Haakon har fungert som regent medan kong Harald og dronning Sonja (88) var på utanlandstur.
Universitetssjukehuset Hospiten Sur på Tenerife.
Ein auke i oppdrag
Like før turen hadde kong Harald tett program og auka tal i offisielle oppdrag.
Fram til vinterferien hadde kongen gjennomført enda fleire oppdrag enn på same tid i fjor.
Det trass i Slottet si varsling i 2024 om at kongen måtte trappe ned arbeidet etter at han blei alvorleg sjuk i Malaysia same året.
Kong Harald og dronning Sonja på tribunen under OL.
Kongeparet var synleg på tribunen under OL i Italia for å heie fram dei norske skøyteløparane.
Det var første gang kongeparet var på OL-tribunen sidan 2014.
Kongeparet sitt neste offisielle oppdrag er 12. mars. Dei skal ta i mot utanriksminister Espen Barth Eide (Ap) i audiens.