Herold

USAs forsvarsminister Pete Hegseth åtvarar Iran mot å tru at USA ikkje er i stand til å oppretthalde den noverande krigføringa. – Vi har berre så vidt begynt, seier Hegseth.

Under ein pressekonferanse hos den amerikanske sentralkommandoen Centcom i Tampa kom Hegseth med ei tydeleg åtvaring til det iranske regimet.

– Iran håpar at vi ikkje skal klare å stå i dette over tid, men det er ei svært alvorleg feilvurdering frå den iranske revolusjonsgarden. Vi har berre så vidt begynt å kjempe, sa Hegseth.

Han sa at USA har meir enn nok ammunisjon og ressursar til å halde fram med krigføringa så lenge det er nødvendig.

– Tidslinja vår er vår, og den er det berre vi som har kontroll over, sa Hegseth.

– Ny fase

Han varsla vidare at operasjonen no går inn i ein ny fase der målet er å systematisk øydeleggje Irans kapasitet til å produsere missil, og ikkje berre øydeleggje det dei har av lager og utskytingsstader.

Statlege iranske medium melde natt til fredag om eksplosjonar fleire stader i hovudstaden Teheran.

Informasjonen om kor store dei amerikanske lagra av våpen og ammunisjon er, er hemmelegstempla. Men fleire ekspertar og medlemmer av Kongressen er usikre på om lagra er store nok.

Den republikanske senatoren Tim Sheehy blei tysdag spurd om han er uroa når det gjeld lagra. Han svarte: «Vi må utvide kapasiteten til å produsere ammunisjon, og leggje meir vekt på kvantitet enn berre kvalitet».

Yama Wolasmal oppsummerer de siste angrepa.

Torsdag kveld sa ein talsperson for det israelske forsvaret (IDF) at dei har starta ei «omfattande angrepsbølgje» mot viktig infrastruktur i Teheran.

Over 4000 sivile bygningar er øydelagde i Iran etter at USA og Israel starta angrepa mot Iran for snart ei veke sidan, ifølgje Raude Halvmåne i Iran.

Video viser røykskyer over Teheran natt til fredag.

Angrep mot Beirut

Israel gjennomfører også omfattande angrep i den libanesiske hovudstaden Beirut. Angrepa er først og fremst retta mot mål som har tilknyting til den Iran-støtta Hizbollah-militsen.

Hizbollah har denne veka angripe Israel med rakettar som ein reaksjon på at den øvste leiaren i Iran, ayatolla Ali Khamenei er drepen.

Torsdag blei hundretusenvis av menneske i fleire bydelar oppfordra til å forlate heimane sine, og komme seg ut av byen.

Over 30 iranske skip senka

USA har angripe rundt 200 mål i Iran dei siste 72 timane.

– Fram til no har USA senka meir enn 30 iranske skip, sa admiral Brad Cooper som er sjef Centcom.

Han sa vidare at USA hadde angripe eit iransk drone-hangarskip. Han samanlikna storleiken på skipet med eit hangarskip frå andre verdskrigen.

Han stadfesta at skipet blei treft kort tid før pressekonferansen.

– Det står akkurat no i brann, sa Cooper.

USA trefte eit iransk droneskip torsdag som dei samanliknar med eit hangarskip frå andre verdskrigen.

Han la til at skadane på skipet var omfattande.

Talet på iranske ballistiske missilangrep har falle med 90 prosent og droneangrep har gått ned med 83 prosent sidan USA og Israel starta angrepet mot Iran 28. februar.

Hegseth understreka at USA ikkje aksepterer Irans krigføring til sjøs, og at slike fartøy er legitime mål.

Eit fleirtal i Representanthuset stemte torsdag mot eit forslag om å avgrense president Trump sin rett til å halde fram med krigføringa i Iran.

Forslaget ville pålagt presidenten å be Kongressen om løyve til å halde fram med angrepa mot Iran. Det fall med 219 mot 212 stemmer. Onsdag gjorde Senatet eit tilsvarande vedtak.