Herold

Kåre Flatlandsmo (1946–2026) døydde 17. februar. Med Kåre sin bortgang har Voss Naturvernlag mista ein av dei som har gjort størst innsats for naturen på Voss.

Me sender varme tankar til familien og dei næraste.

Kåre var leiar i Voss Naturvernlag frå 2014 til 2022. Han kom inn med eit sjeldan spenn i erfaring: teknikk, økonomi og forvaltning – og ei sterk kjensle for naturen han ville ta vare på.

Kåre hadde ein ro som smitta. Han heldt fast på fakta, etterprøvbarheit og ein ryddig samtale, fordi han meinte naturen fortener respekt, kunnskap og grundig saksbehandling – særleg i møte med krefter i samfunnet som ofte har andre mål.

Han sette ord på naturverdiar og gjorde dei konkrete: verdiar for folk, for lokalsamfunnet, for framtida. I arbeidet med vassdragssaker på Voss vart denne kombinasjonen avgjerande: fagleg tyngd, lokalkunnskap og eit blikk for heilskapen.

Kåre var glad i friluftslivet – i Bordalsfjella, i turane og i den stille gleda over å vera ute. Han bar med seg ein grunnleggjande tanke: Me kan ikkje løysa klimautfordringane ved å pressa naturmangfaldet endå meir.

Me takkar Kåre for innsatsen for naturen, og for klokskapen og tryggleiken han gav laget.