Herold

Det var norsk-iranske Hamid Amini som blei drepen i eit luftangrep i Iran laurdag. Han var i landet på foreldrepermisjon, opplyser arbeidsgjevaren DNV.

Norsk-iranaren Hamid Amini blei drepen i eit amerikansk-israelsk angrep laurdag morgon, stadfestar arbeidsgjevaren hans DNV.

Kommunikasjonssjef Ulrike Haugen seier til NRK at Amini var i Iran på foreldrepermisjon saman med kone og barn.

– Tankane våre går til familien hans, seier ho.

Haugen seier det går bra med resten av familien.

Amini var ingeniør og hadde arbeidd i DNV i nesten 15 år.

Amini blei drepen i eit luftangrep mot byen Lamerd sør i Iran laurdag.

Utanriksdepartementet seier har kjennskap til at ein norsk borgar skal vere drepen i Iran.

– Utanrikstenesta er blitt gjort kjent med at ein norsk borgar skal ha omkomme i Iran, men opplysningane lar seg ikkje stadfeste på grunn av situasjonen i Midtausten, seier pressetalsperson i UD Mathias Gjesdal Hammer til NRK.

UD opplyser til NRK at det er rundt 15 nordmenn som har registrert seg som buande i Iran, men det reelle talet er truleg langt høgare, seier Hammer.

– Erfaringsmessig aukar talet på registrerte norske borgarar når det skjer ei krise i landet dei er i.

VG omtalte dødsfallet til Amini først.

Hundrevis drepne i krigen

Det er uvisst kor store øydeleggingar luftangrepa til USA og Israel mot Iran er.

Men ifølge iranske styresmakter er over 700 menneske drepne i angrepa sidan laurdag, melder Reuters.

Fleire av dei drepne er sivile.

Blant bygningane som blei bomba laurdag, var ein jenteskule i Minab vest i Iran. Minst 165 menneske blei drepne og 96 barn skal vere skadde, ifølge påtalemakta i byen.

Tysdag samla sørgande seg i byen Minab i Iran i gravferda til ofra etter eit luftangrep mot ein barneskule i byen laurdag.

Det er ikkje kjent kven som fyrte av missilet som trefte skulen, som låg rett ved ein iransk militærbase som skal ha vore eit mål for israelske og amerikanske styrkar.

Det amerikanske forsvaret seier dei skal undersøke kva som har skjedd.