Herold

Ola Jøsendal frå Alver døydde brått og uventa torsdag i førre veke.

(BA/NH) Ola Jøsendal hadde ein lang karriere bak seg som leiar i helsevesenet.

Sidan januar 2024 var han tilsett som viseadministrerande direktør i Helse Nord. Dit kom han frå stillinga som fagdirektør i Helse Vest.

Jøsendal var utdanna samfunnsmedisinar og var spesialist innan rus- og avhengighetsmedisin, og mykje av yrkeskarrieren sin jobba han innan rusmedisin.

Han var i fleire år avdelingsdirektør ved Avdeling for rusmedisin i Helse Bergen. Før det var han klinikksjef ved Stiftelsen Bergensklinikkene.

– Treffer oss tungt

– Ola sin plutselege og uventa død treffer oss tungt og gjer vondt. Han var ein dyktig, engasjert og høgt skatta leiar og kollega. Ola bidrog i arbeidet vårt med sterk kunnskap, eit ukueleg engasjement for pasientane og helsetenesta, og med varme og omtanke overfor kollegaer. Vi lir eit stort tap og er i sorg. Våre tankar går til Ola sin familie og mange venner, skriv administrerande direktør i Helse Nord Marit Lind i ein uttale.

Helse Nord skriv i eit minneord på si nettside at då han blei funnen, fanst det ikkje teikn på anna enn ein naturleg død.

I tillegg til å ha vore kommuneoverlege i Bergen, var han også legevaktsjef i dåverande Lindås kommune og stabslege i Sjøforsvaret.

Til støtte i ei årrekke

Jøsendal brukte også kreftene sine i idrettslivet i Nordhordland. Mellom anna var han engasjert i ulike roller hos NBK i ei årrekke.

– Det er ei utruleg trist nyheit, seier dagleg leiar for klubben, Øystein Johansen, om Jøsendal sin bortgang.

Johansen fortel at Jøsendal ikkje berre var viktig som trenar i ulike aldersklasser, men han engasjerte seg og med kunnskapen sin som lege.

– Seinast i haust og i vinter hjelpte han spelarar som hadde behov for det.

For få år sidan var Jøsendal trenar i Radøy. Då trente han A-laget til klubben opp til 4. divisjon.

Han jobba også som lege for Brann, og var med i teamet då Brann vann seriegull i 2007.

Ola Jøsendal etterlet seg kone og seks barn.