Herold

I etterkant av Stortinget si handsaming av Helse Førde- forslaget om nedlegging av ortopedisk avdeling i Lærdal, kan ein lese litt av kvart om forslaget til Senterpartiet. Det kan ikkje stå uimotsagt.

Dalin( MDG) seier til Sogn Avis at forslaget vårt om å oppretthalde ortopedien i Lærdal er« lettvindt populisme». Han seier vidare at forslaget kunne ført til potensielt farlege kutt ved alle sjukehusa som ville svekka pasienttilbodet. ( Sogn Avis 26.2) Vereide (Ap) kallar også forslaget for populisme, og går enno hardare ut og meiner at Senterpartiets kamp for å bevare lokale helsetenester på Vestlandet kan sette menneskeliv i fare. Altså at liv kan gå tapt, om ortopedien i Lærdal hadde litt vidareført. ( Nationen 25.2.)

Eg forstår at angrep er det beste forsvar. Men å skulde andre politiske parti for å sette liv i fare med sin politikk, er ein dryg påstand. Eg kunne lett argumentert tilbake. For det å legge ned skadepoliklinikken i Lærdal, det vil kunne sette liv i fare. Å legge ned ortopedien kunne også sette liv i fare. Å svekke beredskapen i Indre Sogn, ville kunne sette liv i fare. Men vi skuldar ikkje AP for å ta liv med sin helsepolitikk.

Eg forstår at Vereide har hatt ei vanskeleg sak. Men eg trur han hadde stått seg på å gjere det same som ordførarane i Indre Sogn. Stått opp for veljarane sine. Sjølv om partiets hans ikkje var einig.

Vereide kallar Sp forslaget for bløff og magisk løysing, og Dalin har sagt noko av det same. Vereide gjentek at det ikkje finnast pengar til å vidareføre ortopedien, utan å kutte i kreftbehandling eller barneavdelinga i Førde. Det er tull, og det veit han godt. Og for å gjenta: Senterpartiet fekk inn meir pengar til sjukehus enn både det Ap og MDG hadde i sine alternative budsjett.

Helseministeren Jan Christian Vestre (Ap) gjekk nyleg ut i Finnmark og gav knalltydeleg beskjed om at fødestua i Alta ikkje kunne sommarstengast, sjølv om helseføretaket hadde forslag om det. Det same kunne Vestre ha gjort i Helse Førde, altså gitt styringssignal om kor grensa for helsesentralisering i Sogn og fjordane går. Men Vestre ville tydelegvis sentralisere ortopedien til Førde. Det er sanninga.

For han hadde pengar. I førre veke omtalte Bergens Tidende at regjeringa no ville doble betaling for operasjonar i Bergen for å få ned ventelistene. Når regjeringa finn 52 millioner kroner til å doble betalinga for operasjonar i Bergen, har dei sjølvsagt hatt moglegheit til å 25 mill.kroner for å oppretthalde vanleg betalte ortopedioperasjonar i Lærdal.

Så dette handla kanskje ikkje så mykje om pengar, trass alt. Sentralisering i Helse Førde er nettopp regjeringas helsepolitikk. Det er villa sentralisering. Litt vanskeleg økonomi i helseføretaket var anledninga som opna seg for å endeleg få gjort det mange i helseføretaket og sentralistar i AP- regjeringa har hatt lyst å gjere lenge.

Nemleg samle all kirurgi i Førde. Dei torde ikkje gjere dette medan Sp var i regjering med dei. Men så snart vi var ute, så tok ein sjansen. Og dei fekk sentralistane i MDG med på laget.

For meg og Senterpartiet var den 24.2 ein trist dag i politikken. Vi er veldig skuffa over at Arbeiderpartiet vender distrikta og Senterpartiet ryggen, og driv splitt og hersk mellom raudgrøne parti for å hindre vårt forslag om stopp av helsesentraliseringa i Sogn og Fjordane. Til Ap: eg trudde at vi hadde nokon felles distriktsverdiar å kjempe for i helsepolitikken. Men no ser det ut til å rakne når de vel å sentralisere stort i lag med MDG og Høgre.

Vereide og Dalin kan kalle det populisme. Men i følgje Store Norske Leksikon er populisme ein omtale av ein ideologi, strategi eller kommunikasjonsform som appellerer til» folket», som motsetning til «eliten». I denne saka er eg heilt trygg på at det var heilt rett å stå på folket si side i Indre Sogn, og ikkje eliten i Helse Førde og i regjeringskorridorane i Oslo