Herold

Talet på heilt arbeidsledige fall med 500 personar frå januar til februar, justert for sesongvariasjonar. Andelen heldt seg likevel stabil på 2,1 prosent.

Av NPK

Det viser tal frå Nav.

– Arbeidsløysa held fram med å falle den andre månaden i år, og det er framleis mange ledige stillingar. Samtidig ser vi forskjellar mellom ulike yrke, og etterspurnaden er særleg høg etter mellom anna sjukepleiarar og helsefagarbeidarar. Dette er også grupper med låg registrert arbeidsløyse, seier konstituert arbeids- og velferdsdirektør Eve Vangsnes Bergli i Nav.

I februar var det 62.112 arbeidsledige personar, justert for sesongvariasjonar. Det er ein nedgang på 500 personar frå januar.

Tala viser også at arbeidsløysa for personar mellom 20 og 49 år går ned. Nedgangen her er størst blant personar mellom 25 og 29 år, i denne alderen er det 2 prosent færre heilt arbeidsledige, justert for normale sesongvariasjonar.

– Trekkjer rentebanen litt opp

– Noregs Banks anslag for arbeidsløyse er på 2,2 prosent. Talet for arbeidsløyse no indikerer litt meir press i økonomien enn det Noregs Bank har lagt til grunn, og isolert trekkjer det rentebanen litt opp, seier sjeføkonom Kyrre M. Knudsen i SpareBank 1 Sør-Noreg i ein e-post til NTB.

Samtidig er det andre mål på pressa i norsk økonomi som tyder på at han er på eit nærare normalnivå, ifølgje Knudsen.

Arbeidsløysa litt opp i Trøndelag og Troms

Det var nedgang i arbeidsløysa eller uendra arbeidsløyse i dei fleste fylka i landet i februar. Berre i Trøndelag og Troms var det oppgang for dei som er heilt arbeidsledige, med sesongjusterte tal.

Det er høgast arbeidsløyse i Østfold og Oslo, der 3 og 2,9 prosent av arbeidsstyrken er registrerte som heilt ledige.