Herold

Ein person er bekrefta omkommen etter ei ulykke med speedgliding i Loen i Stryn søndag formiddag.

Saka oppsummert:

– Ein person er bekrefta omkommen etter ei speedgliding-ulykke i Loen, Stryn, søndag føremiddag. – Politiet fekk melding om ulykka klokka 10.29, og redningshelikopter blei sendt til staden. – Den omkomne blei henta ut av bratt fjellterreng, men livet stod ikkje til å redde. – Årsaka til ulykka er førebels ukjend, og politiet etterforskar saka. – Dei pårørande er varsla, men identiteten til den omkomne er ikkje offentleggjort. – Speedgliding er ein ekstremsport der ein flyg tett på terrenget med ein liten, rask skjerm.

Oppsummeringa er laga av ei KI-teneste frå OpenAI. Innhaldet er kvalitetssikra av NRK sine journalistar før publisering.

Politiet melde om ulykka klokka 10.29 søndag formiddag, og redningshelikopter blei sendt til staden.

Kort tid seinare blei personen henta ut av det bratte fjellterrenget, men blei bekrefta omkommen av lege på staden.

Avdøde er ein mann i slutten av 20-åra.

– Ulykka har skjedd i samband med speedgliding. Det er for tidleg å seie noko om årsaka til ulykka og dette vil den vidare etterforskinga prøve å avdekke, skriv Ole Ronny Olsen i Vest politidistrikt i politiloggen.

Vest politidistrikt oppgir at dei pårørande er varsla.

Speedgliding er ei form for paragliding der ein bruker ein liten og svært rask skjerm. Utøvaren startar vanlegvis ved å springe eller køyre på ski ned ei bratt fjellside for å få løft, og flyg deretter tett på terrenget i høg fart.

Loen er eit populært reisemål for ekstremsportutøvarar frå heile verda. Området rundt fjellet Hoven og Via Ferrata Loen er hyppig brukt til speedgliding og basehopping, men det er foreløpig ikkje kjent nøyaktig kor hoppa starta eller kva som utløyste ulykka.

Politiet vil rutinemessig etterforske saka for å kartlegge årsaka til ulykka. Det er foreløpig ikkje gitt informasjon om nasjonalitet eller identitet på den omkomne.