Herold

Magnus Smidesang Rønningen og kreditorar har funne ei løysing i Vågå.

Saka samanfatta:

• Magnus Smidesang Rønningen har inngått ei frivillig gjeldsordning med kreditorane i Vågå-selskapa.
• Løysinga inneber eit innskot på sju millionar kroner frå nye investorar, og kreditorane får tilbake om lag halvparten av det uteståande.
• To av Vågå-selskapa, Vågå Overnatting AS og Bokhandel’n Kafe AS, blir tvangsavvikla grunna at revisor har slutta.
• Rønningen vil halde fram som medeigar i Vågå og meiner dei største økonomiske utfordringane er over.
• Ein kreditor uttrykkjer misnøye med tap, men håpar på vidare utvikling av Bygde-Noreg.

Oppsummeringa er laga av ei KI-teneste frå OpenAI. Innhaldet er kvalitetssikra av NRK sine journalistar før publisering.

Over lengre tid har Magnus Smidesang Rønningen jobba med ei frivillig gjeldsordning for Vågå-selskapa, retta mot kreditorane som ikkje har sikra seg med pant.

No har dei kome til einigheit, seier advokat Nils Holger Koefoed i Ro Sommernes til Dagens Næringsliv.

Ifølge avisa inneber løysinga eit innskot av frisk eigenkapital på sju millionar frå nye investorar, utan at avisa er kjent med kven dei er.

Det var GD som fyrst omtala saka.

I 2022 kjøpte Magnus S. Rønningen seg opp i Vågå. Planen var å satse på reiselivsnæring og å blåse liv i bygda.

Fortset som medeigar

Rønningen skriv til NRK i ein e-post at han vil fortsette som medeigar i Vågå.

– Eg likar å fullføre det eg startar, og vil fortsette som medeigar i Vågå. Eg føler meg sikker på at vi skal greie å komme i mål med den visjonen vi starta ut med. Dei største økonomiske løfta er gjort, så får vi sjå om det er sjarmøretappen eller eit nytt maraton som gjenstår. Det veit ein aldri i det private næringslivet.

Advokaten seier at løysinga inneber at kreditorane får drygt halvparten av det uteståande.

Andre kreditorar

Den frivillige gjeldsordninga galdt kreditorar som ikkje hadde sikra krava sine ved for eksempel pant i eigedom.

Blant dei største kreditorane som har teke pant i Vågå-eigedommane, finn vi Sparebanken 1 Lom & Skjåk med pant for til saman 140 millionar kroner, Skatteetaten med litt over 700.000 kroner og mellom anna tidlegare advokatar og rekneskapsførarar for selskapa.

Ifølgje advokat Nils Holger Koefoed i Ro Sommernes er alt uteståande gjort opp med tidlegare advokatar, rekneskapsførarar og skatteetaten i tråd med den frivillige gjeldsordninga.

Han seier også at banken fortsett som bankforbindelse.

– Som panthavar har vi i slike prosessar tett dialog med låntakar og den juridiske rådgivaren til låntakaren. I denne saka har banken jobba for ei løysing for å sikre leverandørane delvis oppgjer. Framover er det viktig for banken å sikre føreseielegheit for næringsdrivande og leigetakarar i Rønningen sine eigedommar i Vågå. Når det gjeld detaljar i forholdet mellom banken og låntakar, kan dette ikkje delast, seier administrerande banksjef Unni Strand til avisa GD.

– Bygde-Noreg må vidareutviklast

Torstein Brun, ein av dei største usikra kreditorane, stadfestar at Brun Bygg har vorte samde med Rønningen.

– Ifølgje DN er det snakk om at kreditorane har fått tilbake om lag halvparten av det Rønningen skuldar dykk?

– Det er i det området der, ja.

– Er de nøgde?

– Eg kan ikkje seie eg er direkte nøgd, men dette er ei form for akkordløysing som vart tilboden alle kreditorane, og som alle måtte akseptere. Då vart det slik.

Han minner om at det er mange som har tapt monalege summar på Vågå-selskapa til Rønningen, inkludert den lokale banken, lokale entreprenørar og ikkje minst Rønningen sjølv.

– Eg kjenner ikkje til Rønningen sine vidare planar, men håpar Vågå kjem positivt ut av dette. Vi treng at Bygde-Norge blir vidareutvikla.

Advokat Nils Holger Koefoed opplyser at Rønningen taper 76 millionar kroner i forfalle lån frå sitt holdingselskap, puss all eigenkapital som er skote inn i tillegg.

Torstein Brun i Brun Bygg har vore ein av dei større aktørane i Vågå som ikkje har fått fullt ut betalt for arbeidet i Rønningens eigedomar.

Tvangsavviklar to selskap

To av Vågå-selskapa blir avvikla.

Vågå Overnatting AS og Bokhandel’n Kafe AS har vore under avvikling sidan hausten 2024. Men fordi Brønnøysundregistera ikkje har fått beskjed om endeleg sletting, har bustyrar Ingrid Storvik i Advokatene i Vågå fått ansvar for å tvangsavvikle selskapa. – Eg har akkurat tatt imot desse sakene, så eg har ingen informasjon til dykk ennå, seier Storvik.

Tidlegare har òg Kaffekroken Biteti AS blitt avvikla.

• Etter at Magnus Smidesang Rønningen kjøpte halve Vågå, har kreditorane over lengre tid skrapa på dørene

Raude tal

Det har knapt vore reell drift i Vågå Overnatting AS sidan oppstarten av selskapet i 2022, ifølge årsrekneskapane.

Den siste leverte årsrekneskapen enda med eit resultat før skatt på minus 269.000 kroner, med ein eigenkapital på minus éin million i 2024.

Selskapet har også ei langsiktig gjeld på nesten 5,4 millionar kroner til andre selskap i same konsern.

• Kjendisinvestor saksøkte tidlegare hotelleigar – vann fram i retten

Gjeld til lokalbanken

Bokhandel’n Kafe AS har berre levert årsrekneskap for 2023.

Da omsette selskapet for 7,3 millionar kroner, og enda med eit resultat før skatt på minus 3,5 millionar kroner.

Også i dette selskapet er eigenkapitalen tapt, han var på minus 5,6 millionar kroner.

Ifølge årsrekneskapen har selskapet ei kortsiktig konserngjeld på 8,7 millionar kroner, samtidig som dei også noterer at gjelda til selskapet er i Sparebank 1 Lom og Skjåk.

Dagens kafédrift i bygget Bokhandel’n er tatt over av andre.

– Vi som driftar no har ingenting med det selskapet å gjere, og er da ikkje påverka av denne tvangsavviklinga, bekreftar drivar Tor Andvord.