Herold

Kommunane i Sogn ser på korleis ein kan samarbeide betre om tenester, og kommunedirektørane/rådmennene har kome med eit framlegg om fire tenester med vertskommuneansvaret plassert i Vik for kartsamarbeid, Luster for skog, Årdal for NAV og Sogndal for barnevern.

Eg er positiv til samarbeid mellom sognekommunane. Likevel vil eg løfte ei problemstilling. Eg har stilt spørsmål ved NAV-samarbeidet fordi eg særs utrygg for om det å velje Årdal som vertskommune kan ha konsekvensar for dei mange statlege, regionale arbeidsplassane i NAV-bygget på Leikanger. Det kan ikkje regionen risikere, og om vi skal gå vidare med desse planane, må dette avklarast.

NAV har ei stor økonomiteneste på Leikanger. NAV kontaktsenter har mange medarbeidarar i NAV-bygget, og i tillegg valde NAV Vestland Leikanger som lokasjon for sitt regionkontor for Sogn. Dei fleste av arbeidsplassane i NAV-bygget er staduavhengige, det betyr at dei kan løysast andre plassar i Vestland og i landet. NAV har rekruttert godt på Leikanger, og har bygd opp eit sterkt kompetansemiljø, likevel kan føresetnadene endre seg.

I første omgang er det regionkontoret for Sogn som kan kome i spel om sognekommunane vel Årdal som vertskommune for NAV-samarbeidet.

Dette handlar ikkje om kvaliteten på NAV-kontora i kommunane i Sogn. Dette handlar om at vi ikkje kan setje viktige arbeidsplassar i spel. Difor må dette vere ein del av saksutgreiinga når kommunestyra i Indre Sogn kvar for seg skal gjere vedtak.

Om denne kunnskapen ikkje vert ein del av saksgrunnlaget før jul, må avgjerda utsetjast.