Herold

Hydro Husnes og dei andre norske aluminiumsverka har donert over 10.000 flammehemmande arbeidsplagg til Ukraina.

Dei siste to åra har Hydro sine aluminiumsverk i Norge donert 5.855 jakker og 4.960 bukser i flammehemmande materiale til Ukraina.

Hydro Husnes har donert ein stad mellom 2.000 og 2.500 sett.

– Vi byta arbeidstøy for ei tid sidan. Då byta vi og dei andre lokasjonane i Norge frå ein raud modell til ein modell med anna passform og utsjånad, og då vart det andre arbeidstøyet avleggs. Det blei mykje flammehemmande tøy til overs, dette er tøy som er i ok stand, og som har fått eit nytt liv gjennom at det kjem til nytte i Ukraina. Det er bra, seier fabrikksjef Jon Ola Ystgaard til Kvinnheringen.

– Sirkulærøkonomi i praksis

I staden for at tøyet blei destruert, har det blitt vaska, bretta, sydd, kvalitetssikra og klargjort av Sogn Vest, før det vidare har blitt sendt til Ukraina.

«Sogn Vest, som tilbyr arbeid til menneske som av ulike grunnar fell utanfor den ordinære arbeidsmarknaden, har stått for fjerning av logoar og ompakking», står det å lesa i ei pressemelding.

Tidlegare fabrikksjef ved Hydro Husnes og no leiar for Hydro si aluminiumsverksemd i Norge, Johan Berg, fortel i pressemeldinga at dei er glade for å kunna bidra.

– Dette er sirkulærøkonomi i praksis. Tøy som elles ville blitt destruert får nytt liv og bidrar til å redda liv. Vi er glade for å kunna bidra med direkte støtte til brann- og redningstenester i Ukraina, seier han i pressemeldinga.

«Lothepus» har tatt over tomt på Husnes: – Har lyst å få til noko kjekt der ute