Ullensvang førebur 8. mars-markering med hovudparole mot vald mot kvinner
Plus
- mars-komiteen i Ullensvang er i full gang med planlegginga av årets markering av den internasjonale kvinnedagen.
Ifølge ei pressemelding frå komiteen vil årets hovudparole vere «Fridom frå vald mot kvinner», og arrangementet vil tradisjonen tru finne stad på Sentralbadet litteraturhus.
Komiteen, som består av representantar frå Pensjonistforbundet Odda-Tyssedal, Ap, SV og Raudt, i samarbeid med Sentralbadet litteraturhus, understrekar at parolen er både kraftfull og aktuell. Den rettar seg mot sexisme, psykisk og fysisk vald og overgrep, og uttrykkjer solidaritet med kvinner som opplever vald, står fram og kjempar for fridom og rettferd.
I pressemeldinga vert det peikt på at Epstein-sakene er sentrale for valet av årets hovudparole. Desse sakene blir omtalt som «ein kvinnehistorisk katastrofe», men også som eit døme på kor viktig kvinnerørsla og feminismen er for å «vise veg, byggje bruer og flytte grenser».
Sjølve markeringa vil følge etablerte tradisjonar med tog, appellar og musikalske innslag ved Sentralbadet litteraturhus. 8. mars-komiteen legg stor vekt på at kvinnedagen er ei tverrpolitisk markering. Alle parti, lag, organisasjonar, feministar, humanistar og enkeltpersonar er hjarteleg velkomne til å delta.
– Arrangementet er gratis og ope for folk i alle aldrar, skriv Lisa Karine Haugland på vegner av 8. mars-komiteen.