Som foreldre til eit barn med store og samansette behov har vi fått kjenne på kroppen kva det betyr når hjelpa sviktar.

Forslaget om nedlegging av familieeininga og Knausen skule rammar dei familiane som treng det mest

Du leser nå et leserinnlegg. Det uttrykker innsenderens mening.

Før vi kom til Knausen, stod vi i ein omsorgsbyrde som var så tung og uoversiktleg at vi ikkje såg nokon veg vidare. Manglande forståing, koordinering og støtte i eigen kommune gjorde situasjonen uhaldeleg. Vi var utslitne, og i ein periode så pressa at vi som foreldre var på veg til å gå til grunne.

Det var først då vi kom til Knausen at vi for første gong opplevde å bli møtt, sett og forstått som ei heilskapleg eining. Der var det ikkje fragmenterte tenester som jobba kvar for seg, men eit samla tverrfagleg miljø som såg heile bildet. Dei hadde høg fagkompetanse, men også noko som er minst like viktig: ei unik relasjonskompetanse som skapte tillit og tryggleik frå første stund.

Les også:

På Knausen blei både barnet vårt og søskena og vi foreldre sett – ikkje berre i samtalar, men i heile kvardagen sin. Dei observerte og forstod barnet i skule, i bustad, i aktivitetar og i dei små, men viktige overgangane som ofte er dei mest krevjande. Det gav ei innsikt og ei total forståing vi aldri hadde møtt nokon annan stad.

For oss var dette ikkje berre eit tiltak. Det var redninga. Utan denne hjelpa hadde vi ikkje vore den familien vi er i dag. Og kostnadene for samfunnet – både menneskelege og økonomiske – ville vore enorme om vi hadde gått til grunne.

Les også:

Difor er det uforståeleg og djupt uroleg at familieeininga no blir vurdert nedlagt og avvikla som tilbod. For kven skal ta imot dei familiane som står i same situasjon som vi gjorde? Kven skal sjå heile familien, ikkje berre arbeide fragmentert og oppstykka? Kven skal sikre at barn med store behov blir forstått i alle settingar – ikkje berre på eit kontor?

Vi veit av eigen erfaring at dette tilbodet fungerer. Vi veit at det reddar familiar. Og vi veit at det sparar samfunnet for enorme kostnader på sikt.

Å legge ned eit fagleg sterkt, tverrfagleg og livsviktig tilbod som dette, er ikkje berre eit administrativt vedtak. Det er eit val som får direkte konsekvensar for dei mest sårbare barna og familiane i Møre og Romsdal.

Vi håpar dei som no tek avgjerdene, lyttar til dei som faktisk har stått i dette – og forstår kva som står på spel.

Fortvila foreldre i Møre og Romsdal

Les også:

Vil du skrive i På tråden? Send e-post til ordetfritt@r-b.no

Vil du skrive leserinnlegg? Send e-post til ordetfritt@r-b.no

Her finner du meningsstoffet i Nordvest debatt – Rbnetts meningsportal