Herold

Ras og rasfare har skapt trøbbel på vegane siste dagane. No skapar flaum store forseinkingar i togtrafikken i Vestland.

Det er store forseinkingar på Vossebanen og Bergensbanen grunna flaum og signalfeil.

Dette råkar dei fleste avgangane, så reisande må rekne med ekstra ventetid, opplyser Bane Nor.

Samstundes haglar farevarsla og fredag føremiddag er det framleis ei rekke stengde vegar både på grunn av ras og rasfare.

Vegtrafikksentralen ber sjåførane om å vere ekstra på vakt i dag.

Togreisande må rekne med ventetid

Ved Bolstadøyri har jernbanespor stått under vatn på grunn av flaum, og mellom Hallingskeid og Myrdal skaper ein signalfeil kø.

Klokka 12 har vatnet gått noko tilbake, men det er framleis problem på staden, opplyser pressevakt Harry Korslund.

– Vatnet har trekt seg tilbake etter at ispropp og issørpe slapp taket. Som følgje av mykje overvatn i sporet, har vi stadig ein teknisk feil som påverkar styringa av ein sporveksel ved stasjonen, skriv pressevakta i ei oppdatering til NRK.

Feilen fører til redusert sporkapasitet og manglande moglegheiter for kryssing av tog.

Det er usikkert kor lang tid det tar å utbetre feilen.

Snøskred og steinar i vegbana

Ei mengde farevarsel fører til trøbbel også på vegane.

Særleg ille er det i Vestland, men også i Trøndelag kjem det meldingar om glatte vegar. Særleg er det fylkesvegane nord i fylket som er mest utsett.

På morgonkvisten gjekk det mellom anna eit større snøskred på E16 ved Taulen mellom Voss og Vinje i Vestland.

– Raset er ein meter høgt og om lag 15 meter breitt, seier Tom Hansen, trafikkoperatør i Vegtrafikksentralen til NRK.

Også på riksveg 13 har det vore fleire ras og stengingar.

Her kan du sjå oppdatert status frå Vegtrafikksentralen.

I tillegg til stengde vegar det kome ei rekkje andre meldingar om mindre ras, men ikkje alle desse fører til stengde vegar, opplyser Hansen.

Mellom anna kom det i natt ned ein større stein på fylkesveg 615 i Hyen i løpet av natta.

Denne steinen kom dundrande ned i Hopsstranda på fv. 615 i Hyen i natt.

– Krevjande føreforhold

Det er fleire farsevarsel i Vestland også i dag, både for snøskred, sørpeskred, flaumskred og flaum.

Vegtrafikksentralen trur det vil føre til meir utfordringar utover dagen.

– Folk må vere varsame når dei er ute og køyrer, og må avpasse farten litt. I dag må ein vere ekstra påpasselege, seier trafikkoperatøren.

Dette snøskredet gjekk ved Heiane/Sirdal i morgontimane.

Ein del vegar er opne, trass i at det har gått mindre snøskred.

– Du kan kome rett rundt ein skarp sving og så kan det ligge noko is eller andre ting i vegbana, seier han.

I tillegg er det ein del smeltevatn på vegane, noko som ikkje gjer situasjonen noko betre.

Nokre av vegane som har vore stengde har no opna att.

Natt til torsdag gjekk det eit større sørpeskred i Romarheimsdalen på E39. Raset er rydda, men vegen var stengt i store delar av torsdagen og natt til fredag grunna rasfare.

Dette gjeld mellom anna Masfjorden E39. Den blei stengt i går kveld klokka 18.00 og gjennom heile kvelden og natt på grunn av rasfare. Her gjekk det også eit større sørpeskred natt til torsdag.

Vegen blei opna fredag morgon klokka 06.00.

Svært hektisk natt med mange ras

Vegtrafikksentralen har hatt ei svært hektisk natt, fortel Hansen.

– Det har vore ei utfordrande natt, absolutt. Vi har vore stort sett i telefonen i heile natt. Det har gått i eitt.

Det gjekk eit steinsprang på riksveg 13 nord for Segelgjerd i Ullensvang i natt. Trafikken kan passere forbi.

Hansen rosar publikum som har kome med nøyaktige meldingar, noko som har gjort jobben deira enklare når dei melder frå til entreprenør om hendingar.

– Entreprenørane har også hatt hendene fulle i heile natt. Dei har rydda det eine raset etter det andre. Det har vore ein god del småras, steinsprang, snø og veldig mykje is, som dei har rydda etter at det har kome ned, seier Hansen.

Men truleg kan vêret inn mot helga verte betre – i alle fall om vi skal tru statsmeteorolog Julie Solsvik Vågane.

– No har vi hatt ekstra mykje nedbør og høge temperaturar det siste døgnet, ein utfordrande kombinasjon. Men i helga får vi meir pause frå regnet, seier ho.

Sola kan vise seg og det kan verte litt opphaldsvêr, men det vil også kome regnbyer.