Herold

Lokal badmintonungdom og vaksne sørga for gode plasseringar då Stanghelle Idrettslag arrangerte Kraftsmashen nyleg. No vurderer arrangøren å flytta turneringa til seinare på året for å samla fleire deltakarar.

Laurdag 7. og søndag 8. februar var Turbinen fleirbrukshall på Dale staden for badmintonturneringa Kraftsmashen. Sjølv om det er eit nytt styre som sit ved roret, har gjennomføringa gått knirkefritt. Det lokale engasjementet var stort i form av baking, kafévakter, rigging og teljing.

- Det gjekk overraskande bra. Dette er første gongen me arrangerer, men me har fått god hjelp frå tidlegare styre, seier leiar i Stanghelle Badminton, Magnus Seilen.

Færre deltakarar enn før

Totalt fann 72 deltakarar vegen til Turbinen denne helga. Dette er nokre færre enn tidlegare år. Årsaka ligg i eit tett program med mange turneringar fleire helger på rad.

- Me vurderer å flytta turneringa til mars eller april neste år for å få fleire deltakarar, opplyser Seilen.

Beste resultat nokon gong

Sjølv om deltakartalet var lågare, var det sportslege nivået frå vertsklubben høgt. Resultatlista viser at dette er dei beste resultata i historia til Kraftsmashen for dei lokale spelarane frå Stanghelle Badminton.

- Ja, det var sannsynlegvis det beste resultatet i Kraftsmashen si historie, oppsummerar Seilen.

Gull til Christianson

Leo-Zacharias Christianson frå Stanghelle Badminton markerte seg sterkt i klassen Herre Single U15A, der han sikra seg topplasseringa. Han følgde opp suksessen i Herre Double U15A saman med Rafael Niroshan frå Bergen.

I jenteklassen i U15A vart det andreplass til Mathilde Jordal Hesjedal frå Stanghelle IL, som spelte saman med Sofie Fauskanger Hauso frå Askøy. Linnea Gjertine Kvamme vann Dame Single U15B-klassen.

Breidde i vaksenklassane

Også i senior- og vaksenklassane leverte dei lokale spelarane. I Herre Single C vart det andreplass til Modestas Tamasauskis, medan Mikael Gravdal og Thomas Bringsli Midtun delte tredjeplassen.

I dobbelklassen for herrar i C-gruppa sikra Magnus Seilen og Fred Olaf Sørensen seg ein andreplass. Milen Petrov og Sergii Gryshyn spelte seg fram til ein tredjeplass i same klasse.

Maksym Derevianchenko frå Stanghelle IL vann Herre Single D-klassen. I Dame Double D gjekk sigeren til Ilona Dzikevich frå Stanghelle IL og Rachel Chua frå Sotra.