Herold

IL Ternen vil heidra minnet etter Asgeir T. Rusten – ein av dei som har sett dei djupaste og mest varige spora i laget vårt.

Gjennom fleire tiår var han ein berebjelke i utviklinga av skianlegget i Tveitedalen, og mykje av det me i dag tek for gitt, står på grunnmuren han var med å byggja.

Asgeir var ein av dei som såg moglegheiter der andre såg utfordringar. Han var ein av dei som trudde på at draumar kunne bli til røyndom, berre ein våga å starta.

Då planarbeidet med skiløypa i Tveitedalen tok til i 1980, var Asgeir heilt sentral. Han var bindeleddet mellom idrettslaget og grunneigarane, ein trygg og klok samtalepartnar som skapte tillit og samarbeid. I lag med Tobias Hellås, og fleire andre, la han grunnlaget for det som skulle bli eit av dei viktigaste anlegga i bygda vår.

Asgeir var ikkje den som stod fremst med spade og spett, men han var den som bar planane, søknadene, kontakten med kommunen – og ikkje minst entusiasmen. Han var drivkrafta bak tippemiddelsøknadar, kronerulling og innsamlingar. Han var den som fekk folk med seg, som såg verdien av fellesskap og frivillig innsats.

Gjennom åra 1980 til 1994 voks skianlegget fram: Løypetraseane, parkeringsplassen, Ternebu og straumframføring. Då anlegget stod ferdig og gjeldsfritt i 1994, var det i stor grad takka vere Asgeir sin utrøttelege innsats for å skaffa midlar og halda prosjektet på rett kurs. Det er ikkje ei overdriving å seia at utan han, så hadde ikkje Ternen hatt det anlegget me har i dag.

I denne perioden blømde også skiaktiviteten. Ternen hadde eigen skibuss, og 50-60 ungar deltok jamleg på renn. Nokre reiste heilt til junior-NM i Molde, andre gjekk Birken. Det var ei tid prega av liv, meistring og fellesskap – og Asgeir var ein av dei som gjorde dette mogleg.

Asgeir var ein mann av visjonar. I boka «Utåker, høgtid og kvardagsliv», finn me eit sitat som fangar han godt: «Ut frå draumar og visjonar veks det fram ein plan for å få noko til, nett slik det gjorde i Tveitedalen». Slik var Asgeir. Han drøymde – og han handla.

Difor rører det oss djupt at familien, også etter hans bortgang, har valt å føra arva hans vidare. At minnegåva vart gitt til Ternebu i staden for blomar, er ei gåve som treffer oss midt i hjarta. Det er ei handling som speglar Asgeir sine verdiar: Fellesskap, framtidstru og vilje til å byggja noko som varer.

Me i IL Ternen er audmjuke og djupt takksame. For innsatsen hans. For visjonane hans. For alt han gav – og for alt han framleis gjev gjennom minnegåva frå familien.

Me lyser fred over minnet til Asgeir T. Rusten. Og me ber arva hans vidare – i løypene, i Ternebu, og i fellesskapet han var med å skapa.

Takk!