Glimt-helten slo Klæbo – Knutsen kjem med klar beskjed
Sondre Brunstad Fet var eit stort langrennstalent. Etter draumekvelden mot Inter er han ikkje i tvil om at han valde rett idrett.
– Du kunne vore i Milano du nå med eit litt anna karriereval? spør NRK.
– Eg er godt fornøgd med å reise til Milano nå snart, eg, seier Fet med eit stort glis.
29-åringen var høgt oppe etter enda ein magisk kveld i Bodø. Med 3-1-siger over Inter har bodøværingane eit godt utgangspunkt før returoppgjeret i den italienske storbyen på tysdag.
Samtidig som Bodø/Glimt fortset å sjokkere Europa med utrulege resultat, har Johannes Høsflot Klæbo blitt den mestvinnande vinterolympiaren i historia med dei fem OL-gulla sine i nettopp Milano.
– Eg tippar Klæbo er glad for at han ikkje blei langrennsløpar, for da hadde han ikkje vore ein historisk vinterolympiar nå, spøker Bodø/Glimt-trenar Kjetil Knutsen da NRK konfronterer han med Fet si fortid.
Sjå måla frå Bodø/Glimts seier over Inter i Meisterligaen.
Sondre Brunstad Fet var nemleg eit av Sunnmøres største talent i langrennssporet. Han var kretsmeister som tenåring, og gjekk også fleire av dei same konkurransane som Johannes Høsflot Klæbo, som er fødd året før Fet, som Midt-Norsk meisterskap.
Over to kilometer klassisk klarte faktisk Sondre Brunstad Fet noko ingen av konkurrentane har klart i vinter-OL-et i år: Å slå Johannes Høsflot Klæbo. Som Sunnmørsposten tidlegare har omtalt, skjedde det ifølge Fet i starten av tenåra.
Likevel fall valet på fotball.
– Det var vel rundt dei tidene. Eg angrar ikkje på det valet i dag, smiler Fet, som gav seg med langrenn som 14-åring.
SLO KLÆBO: og no er Klæbo den mestvinnande vinterolympiar i historia.
– Vanskeleg å ta innover seg
Klæbo har sjølv vore open om korleis han ikkje var noka stor stjerne tidleg i tenåra. Som 16-åring blei han for eksempel nummer 80 i Hovedlandsrennet, før karrieren verkeleg byrja å skyte fart.
Nå herjar altså både Klæbo og Fet på kvar sin arena.
29-år gamle Fet opna ballet mot Inter med ei vakker skåring – og tok fleire av lagkameratane på senga da han nytta feiringa til å annonsere at han ventar sitt andre barn.
Fet var også tredje sist på begge av mål til Glimt i andre omgang.
– Det er vanskeleg å ta innover seg alt det her. Vi er i ei boble og berre i nået, så det er vanskeleg å ta innover seg, seier han.
Utgangspunktet betyr at Bodø/Glimt har to mål å gå på før returoppgjeret i Milano. Vinnaren samanlagt tar seg til åttedelsfinalen i Meisterligaen.