Skal samla leiande musikarar frå inn- og utland
Plus
Fleire profilerte utøvarar i europeisk musikkliv kjem til Hardanger når Hardanger Musikkfest fyller 30 år.
Det går fram av jubileumsprogrammet som vart lansert i helga.
Hardanger Musikkfest, som vert arrangert på fleire plassar i Ullensvang frå 26. til 30. august under temaet «Gnist», skal ifølge arrangørane fyllast med kraft, virtuositet og store musikalske møte.
Messiasen Quartet Copenhagen, det prisvinnande Helsinki Chamber Choir og Kringkastingsorkesteret (KORK) under leiing av orkesteret si nye sjefdirigent Holly Choe er alle klare for Hardanger.
Disse musikerne kjem til Hardanger i 2026
Blant solistane finn publikum Ragnhild Hemsing, Tanja Tetzlaff og Thormod Rønning Kvam, alle sentrale, profilerte og høgt verdsette utøvarar i europeisk musikkliv.
Kunstnarisk leiar Therese Birkelund Ulvo understrekar festivalen sine ambisjonar og framhevar spesielt samhandlinga mellom to av årets store trekkplaster:
– Når Hemsing og KORK møtast i Hardangerhallen, veit me at det kjem til å gnistra – musikalsk og emosjonelt, seier Ulvo i ei pressemelding.
Publikum kan også oppleva Benedicte Maurseth sitt kritikarroste verk «Mirra» og unge Martin Steinum Brun. Programmet spenner elles vidt, frå klassiske meisterverk til nyskapande folkemusikk og familievenlege arrangement.
Ulvo skildrar breidda i årets festival:
– I år får publikum alt frå Beethoven sin kamp og kraft og tematikk kring ytringsfridomen, til Marie Curie sitt mot og nysgjerrigheit – og disko. Breie, overraskande og energifylte festivaldagar slik me likar det, seier Ulvo.
Når kvelden senkar seg, står nemleg både diskokveld og fest på programmet på Krossvoll.
Hardanger Musikkfest har sidan starten i 1996 utvikla seg til ei særprega kammermusikkfestival i Norden med sterk lokal forankring.
I jubileumsåret blir dette ekstra tydeleg. Publikum kjem nemleg midt i tida for hausting, når Hardanger bognar av frukt. Der er også lagt opp til at publikum mellom konsertane kan vandra gjennom frukthagar, følge gamle stiar langs fjorden og få smaksprøvar av dei lokale frukt- og sideprodusentane.
Dette er Hardanger Musikkfest